“Ўзбекнефтгаз” матбуот котибининг маълум қилишича, излов-бурғилаш ишлари «Ўзнефт бурғилаш ишлари» МЧЖ томонидан жорий йил 5 август куни бошланган. Қудуқ қисқа муддатда 3159 метр чуқурликкача бурғиланган.
«Ўзбекгеофизика» АЖ мутахассислари томонидан ўтказилган синовларда қудуқнинг 2842–3001 метр оралиғидаги карбонат ётқизиқларидан саноат миқёсида табиий газ ва конденсат оқими олинган.
Айни пайтда қудуқдаги маҳсулдор қатламларнинг коллекторлик хусусиятларини аниқлаш ва уларнинг имкониятларини баҳолаш бўйича геологик тадқиқотлар олиб борилмоқда. Бу ишлар коннинг истиқболларини чуқурроқ ўрганиш ва кейинги босқичларни белгилашга қаратилган.
Синов ишлари якунлангач, табиий газ 15 октябрдан бошлаб истеъмолчиларга етказиб бериш учун қайта ишлашга юборилиши белгиланган.
Шунингдек, йил якунига қадар ушбу конда иккинчи излов қудуғини бурғилаш режалаштирилган. Бу майдоннинг геологик тузилиши ва углеводород салоҳиятини янада кенгроқ ўрганиш имконини беради.
