Хусусийлаштириш жараёнида тўлов шартлари енгиллаштирилиб, аванс миқдори камайтирилмоқда ва бўлиб тўлаш имкониятлари кенгайтирилмоқда.

Янги тартибга кўра, давлат объектларини харид қилишда 15 фоиз аванс тўлаш кифоя қилади. Бу тадбиркорга асосий маблағини ишлаб чиқаришни ривожлантириш ёки янги лойиҳаларга йўналтириш имконини беради.

Актив қиймати 6 ой ичида тўлиқ тўланган тақдирда, шартнома суммасининг 25 фоизи миқдорида чегирма берилади.

Шунингдек, харидор актив қийматининг 50 фоизини 6 ой ичида тўласа, қолган қисмини 7 йил давомида фоизсиз бўлиб тўлаш имкониятига эга бўлади.

Яна бир вариант ҳам мавжуд: актив қийматининг 35 фоизини 3 ойда тўлаб, қолган суммани 5 йил давомида бўлиб тўлаш мумкин.

Ер участкаларини сотишда ҳам тадбиркорлар учун қулайлик яратилади. Жумладан, «тайёр пакет» шаклидаги ерлар савдога чиқарилади. Бунда ер лойиҳаси, зарур рухсатномалар ва коммуникацияларга уланиш бўйича техник шартлар олдиндан тайёрланган бўлади.

Бу тадбиркорнинг аукциондан кейин ҳужжатларни йиғиш ва коммуникация тармоқларига уланиш учун ойлаб вақт сарфлашининг олдини олади.

Ислоҳотдан кўзланган мақсад — иқтисодиётда давлат иштирокини босқичма-босқич қисқартириш, шунингдек, йиллар давомида фойдаланилмай турган активларни инвестиция, даромад ва янги иш ўринлари яратадиган лойиҳаларга айлантиришдан иборат.