Тергов маълумотларига кўра, жиноий гуруҳ аъзолари вазифаларни ўзаро тақсимлаб олган. Жумладан, Ш.У. «омбор мудири», О.М. ва О.Т. «лаборант», Ш.Ў. эса «қадоқловчи» сифатида фаолият юритган.

Тайёрланган моддаларни аҳоли орасида, жумладан таълим муассасалари атрофида тарқатиш учун «тарқатувчи»лар («закладчиклар») жалб қилинган. Шунингдек, ижтимоий тармоқлар орқали онлайн наркодўкон ташкил этилган.

Жиноий фаолиятни амалга ошириш мақсадида икки хонадон ижарага олиниб, уларда моддаларни сақлаш ва қадоқлаш ишлари йўлга қўйилган. Тезкор тадбирлар давомида бир қатор «тарқатувчи»лар ушланиб, улардан 1 050 дона кучли таъсир қилувчи воситалар ва алоқа воситалари аниқланди.

Шунингдек, Тошкент вилоятида ўтказилган тинтув ҳаракатлари давомида 9 кг «Прегабалин», 500 грамм «Тропикамид», 600 дона капсуладаги препаратлар ҳамда қадоқлаш ускуналари далилий ашё сифатида олинди.

Олмалиқ шаҳридаги хонадондан эса қўшимча равишда 6 кг «Прегабалин» ва 500 грамм «Тропикамид» моддалари аниқланди.

Мазкур шахсларга нисбатан Ўзбекистон Республикаси Жиноят кодекси 251-прим.1-моддаси асосида жиноят иши қўзғатилиб, уларга нисбатан қамоқ эҳтиёт чораси қўлланди. Тергов ҳаракатлари давом этмоқда.