Божхона қўмитаси ва Давлат хавфсизлик хизмати ходимлари ҳамкорлигида ўтказилган тезкор тадбирда дала майдонидаги дарахтлар орасига яширилган 4 та хўжалик қопи топилган.

Қоплардан 109 та ўрам чиқди. Экспертиза уларда қарийб 95 килограмм «гашиш» борлигини тасдиқлади.

Бироқ тезкор тадбир шу билан якунланмаган. Ҳуқуқни муҳофаза қилувчи органлар қопларни ким олиб кетишини аниқлаш учун ҳудудни бир неча кун кузатган.

Орадан 8 кун ўтиб, гиёҳвандлик воситаларини олиб кетиш учун келган икки нафар фуқаро қўлга олинган.

Тергов давомида гиёҳвандлик воситаларини айнан шу жойга яшириш ва кейинчалик олиб кетиш бўйича топшириқ берган шахс ҳам аниқланган. У ҳам қўлга олинган.

Қизиғи, мазкур шахс аввал ҳам бензин контрабандаси билан боғлиқ жиноят учун жавобгарликка тортилган бўлган.

Ҳолат юзасидан жиноят иши қўзғатилиб, тергов органига юборилган.

Мутахассислар ҳисоб-китобига кўра, мусодара қилинган гиёҳвандлик воситаси 700 мингта истеъмол дозасига тенг. Дастлабки ҳисоб-китобларга кўра, унинг қора бозордаги қиймати 10 миллион АҚШ долларидан ошиши мумкин эди.