Маълум қилинишича, Ўзгидромет прогнозларига кўра, бугун пойтахт ҳудудига нам ҳаво массаларининг кириб келиши олдидан айрим жойларда қисқа муддатли чанг-тўзонлар кузатилиши мумкин.

Кун давомида об-ҳаво ўзгарувчан бўлиши, баъзи ҳудудларда қисқа муддатли ёмғир ёғиши кутилмоқда. Шунингдек, шамол тезлиги сониясига 12–14 метргача кучайиши мумкин. Кучли шамол таъсирида айрим ҳудудларда чанг кўтарилиши эҳтимоли мавжуд.

Мутахассислар қайд этишича, мазкур ҳолат натижасида атмосфера ҳавосидаги чанг заррачалари, хусусан PM10 концентрацияси қисқа муддатга ошиши мумкин. Бироқ бу вақтинчалик жараён бўлиб, куннинг иккинчи ярмида кузатилиши мумкин бўлган ёғингарчилик ҳисобидан ҳаво сифатининг аста-секин яхшиланиши кутилмоқда.

Шу муносабат билан нафас йўллари касалликлари, аллергия ҳамда юрак-қон томир тизими билан боғлиқ муаммолари бор фуқароларга эҳтиёт чораларини кўриш тавсия этилмоқда. Зарур ҳолатлардан ташқари узоқ вақт очиқ ҳавода бўлмаслик, хонадонларда дераза ва эшикларни ёпиқ сақлаш ҳамда имкони борича ниқоблардан фойдаланиш мақсадга мувофиқ.

Ҳозирда атмосфера ҳавоси ҳолати Махсус комиссия томонидан доимий мониторинг қилиниб, вазият назорат остида сақланмоқда.