Якшанба куни лайнер Нью-Йоркка парвоз қилади ва кейинчалик турли йўналишлар бўйлаб қатнайди.
Uzbekistan Airways шанба куни 2026 йилги футбол бўйича Жаҳон чемпионатида илк бор иштирок этадиган Ўзбекистон миллий терма жамоасини қўллаб-қувватлаш мақсадида безатилган Boeing 787 Dreamliner (UK78706) самолётини тақдим этди. Бу компания самолётининг махсус ливрея олган илк ҳолатидир.
Тақдимот Uzbekistan Airways Technics авиация таъмирлаш корхонаси ангарларидан бирида бўлиб ўтди. Тадбир рэпер Шаҳриёр ва опера хонандаси Женисбек Пиязов дуэти билан бошланди. Мазкур қўшиқ бир кун аввал терма жамоани мундиалга кузатиш маросимида тақдим этилганди.
Авиакомпания раисининг ишлаб чиқариш бўйича биринчи ўринбосари Умид Ҳусанов бу кунни ўзгача деб атади ва ўзбекистонликларни тарихий воқеа билан табриклади.
Ҳаво кемасини брендлаштириш лойиҳаси халқаро авиация талаблари ва техник стандартларга риоя қилинган ҳолда амалга оширилди. Компания матбуот хизматининг хабар беришича, самолётга махсус рамзларни тушириш келишув ва рухсат олиш тартиб-қоидаларидан ўтишни талаб қилади, чунки самолёт ташқи кўринишидаги ҳар қандай ўзгариш хавфсизлик нормалари, эксплуатация қоидалари ва ҳаво кемаси ишлаб чиқарувчисининг талабларига мувофиқлиги бўйича текширувдан ўтказилади.
Лайнер фюзеляжининг олд қисмида Go ёзуви туширилган бўлиб, у Uzbekistan ёзуви билан биргаликда Go Uzbekistan иборасини ҳосил қилади. Шунингдек, у ерда миллий терма жамоа рамзи бўлган оқ бўри тасвирланган. Бўри кийган футболкада «ўн иккинчи ўйинчи»ни ёки ҳар бир мухлисни англатувчи 12 рақами кўрсатилган.
Фюзеляжнинг орқа қисмида ўзбек тилида «Олға, Ўзбекистон!» деб ёзилган. Мотогондолаларда ҳам бўри тасвири ҳамда «UZB2026» ва «Оқ бўрилар» деган ёзувлар туширилган.
Компания вакилларининг Gazeta`га маълум қилишича, якшанба куни эрталаб махсус ливреядаги «Орзу лайнери» Тошкентдан Нью-Йоркка парвоз қилади. У нафақат АҚШга, балки бошқа йўналишларга ҳам парвозларни амалга оширади ва Ўзбекистон футбол терма жамоаси рамзлари турли мамлакатларда кўрилади.
Самолёт ушбу бўёқ билан навбатдаги «чек»гача, яъни режалаштирилган техник хизмат кўрсатиш муддатига қадар бир неча ой давомида парвоз қилади.
Махсус ливреялар самолётларни юзлаб бошқа бортлардан ажратиб туради ва уларни споттерлар учун ноёб объектга айлантиради.
Ўзбекистоннинг футбол бўйича Жаҳон чемпионатида иштирок этиши шарафига Uzbekistan Airways Go Uzbekistan шиори остида махсус сервисли маҳсулотлар коллекциясини ҳам ишлаб чиқди. Булар Нью-Йорк рейсларидаги йўловчилар учун брендлаштирилган бош суянчиқлар ва йўл жамланмалари, шунингдек, борткузатувчилар учун махсус нишонлардир.
