Суҳбат чоғида Гонконг раҳбарининг Ўзбекистонга ташрифи Ўзбекистон–Хитой муносабатларини янада мустаҳкамлаш, шунингдек, мамлакатимиз билан Гонконг ўртасидаги ҳамкорликни янги босқичга олиб чиқишга хизмат қилиши таъкидланди.

Музокараларда инвестициялар, молия, рақамлаштириш, сунъий интеллект, транспорт ва логистика соҳаларидаги ҳамкорликнинг истиқболли йўналишлари кўриб чиқилди. Томонлар Гонконгнинг халқаро молия ва бизнес маркази сифатидаги тажрибаси Ўзбекистон иқтисодиётини модернизация қилиш ва илғор лойиҳаларни амалга оширишда муҳим аҳамият касб этишини қайд этди.

Шунингдек, ҳудудлараро шерикликни ривожлантириш, ишбилармон доиралар ўртасидаги тўғридан-тўғри мулоқотларни кенгайтириш ва қўшма ташаббусларни илгари суриш масалалари юзасидан фикр алмашилди.

Учрашув якунида Ўзбекистон ва Гонконг ўртасида визасиз режимни жорий этиш тўғрисидаги ҳукуматлараро битимни тузиш нияти бўйича вербал ноталар алмашилди. Қайд этилишича, мазкур қадам фуқаролар учун қўшимча қулайликлар яратиш ва ўзаро алмашинувларни фаоллаштиришга хизмат қилади.