Маълум қилинишича, мазкур тарихий воқеани абадийлаштириш мақсадида 999,9 аслликдаги соф олтин ва кумушдан тайёрланган эсдалик тангалар зарб этилган.

Тангалар аверс қисмида Ўзбекистон футбол ассоциацияси логотипи, классик футбол тўпи тасвири ҳамда «Тарихий зафар. Ўзбекистон футболи жаҳон чемпионатида – 2026» ёзуви акс эттирилган. Ушбу элементлар миллий терма жамоанинг илк бор мундиал йўлланмасини қўлга киритганини рамзий ифодалайди.

Реверс қисмида эса мухлислар орасида «Оқ бўрилар» номи билан машҳур бўлган миллий терма жамоа рамзи тасвирланган. Бўри силуэти футболчиларнинг шижоати, жамоавий руҳи ва матонатини ифодаласа, унда акс эттирилган 26 нафар футболчи силуэти тарихий натижа бутун жамоанинг бирдамлиги ва фидокорона меҳнати самараси эканини англатади.


Шунингдек, танга дизайнида миллий терма жамоа либосларидаги нақшлар асос қилиб олиниб, улар орқали Ўзбекистоннинг бой тарихи ва маданий меросига мурожаат қилинган.

31,1 грамм оғирликдаги эсдалик тангалар чекланган миқдорда — 100 дона олтин ва 1000 дона кумуш нусхада ишлаб чиқарилган. Улар юқори бадиий ва коллекцион қийматга эга.

Эсдалик тангалари жорий йилнинг 18 июнь кунидан бошлаб республика бўйлаб 690 та тижорат банки филиалларида сотувга чиқарилади.

Тангалар нархи ҳамда уларнинг банклардаги мавжудлиги ҳақидаги янгиланган маълумотлар Марказий банкнинг расмий веб-сайти ва ижтимоий тармоқлардаги саҳифаларида мунтазам эълон қилиб борилади.