Президенти феълии Бразилия Луис Инасиу Лула да Силва дар даври дуюми интихоботи президентӣ пирӯз шуда, дубора ба мақоми сарвари давлат интихоб гардид. Дар ин бора маълумоти Суди олии интихоботӣ, ки вазифаҳои Комиссияи марказии интихоботро иҷро мекунад, шаҳодат медиҳад. Пас аз коркарди 97,69 фоизи протоколҳо натиҷаҳои интихобот аз нигоҳи математикӣ бебозгашт эътироф шуданд.
Тибқи омори расмии комиссияи интихоботӣ, раҳбари Ҳизби чапгарои коргарон Лула да Силва 51,74 фоизи овозҳоро ба даст овардааст. Рақиби ӯ, номзад аз мухолифини ростгаро ва сенатор Флавиу Болсонару, 48,26 фоизи овозҳоро гирифтааст ва дигар имкони математикии ҷуброн кардани ақибмониро надорад.
Лула да Силва дар таърихи муосири Бразилия аввалин сиёсатмадоре гардид, ки тавонист баъди ақиб мондан дар даври аввали овоздиҳӣ дар интихоботи президентӣ пирӯз шавад.
Президенти интихобшуда 1 январи соли 2027 расман ба иҷрои вазифа шурӯъ мекунад, хабар медиҳад TASS бо истинод ба маълумоти расмӣ.
Дар даври дуюми интихобот иштироки интихобкунандагон 80,79 фоизро ташкил дод. Дар овоздиҳӣ 127 миллиону 807 ҳазору 732 нафар шаҳрванд иштирок карданд.
Сатҳи худдорӣ кардан аз интихобот 19,21 фоизро ташкил дода, ба 30 миллиону 381 ҳазору 854 интихобкунанда баробар шудааст.
Ҳамчунин, ҳиссаи бюллетенҳои холӣ 1,12 фоиз (1 миллиону 426 ҳазору 55 овоз) ва бюллетенҳои беэътибор 2,12 фоиз (2 миллиону 713 ҳазору 225 овоз)-ро ташкил додааст.
