Дар оғози мулоқот Ли Тсзячао паёми самимона ва орзуҳои неки Раиси Ҷумҳурии Мардумии Чин Си Сзинпинро ба роҳбари давлати Ӯзбекистон расонд.
Ҷонибҳо масъалаҳои муҳими тавсеаи минбаъдаи ҳамкориҳои Ӯзбекистону Чин, аз ҷумла рушди робитаҳои байни минтақаҳо ва ҳамкории амалӣ бо Ҳонконгро баррасӣ карданд.
Бо қаноатмандии амиқ қайд гардид, ки дар солҳои охир муносибатҳои дӯстӣ ва шарикии стратегии ҳамаҷонибаи байни Ӯзбекистон ва Чин ба сатҳи бесобиқа расидаанд.
Созишҳои дар сатҳи олӣ бадастомада пайдарпай амалӣ мешаванд. Моҳи май ҷаласаи Комиссияи байниҳукуматӣ дар Пекин ва Форуми сеюми байниминтақавӣ дар Сиан бомуваффақият баргузор гардиданд. Дар Ҳонконг форуми иқтисодӣ ва намоишгоҳи саноатӣ баргузор шуда, Хонаи савдои Ӯзбекистон ифтитоҳ ёфт.
Ба истифодаи иқтидори мавҷуда барои рушди шарикии иқтисодии минтақаҳои Ӯзбекистон бо Ҳонконг таваҷҷуҳи махсус зоҳир гардид. Изҳори боварӣ карда шуд, ки сафари кунунии ҳайати намояндагони доираҳои соҳибкории Гонконг ба шаҳри Тошканд ба ин раванд мусоидат хоҳад кард.
Муҳимияти қабули барномаи ҳамаҷонибаи ҳамкорӣ, ки густариши робитаҳои тиҷоративу иқтисодӣ ва молиявӣ, рушди кооператсияи саноатӣ, табодули таълимӣ, сайёҳӣ ва соҳибкорӣ, инчунин роҳандозии парвозҳои мустақим ва хизматрасонии консулӣ ба шаҳрвандонро дар бар мегирад, таъкид шуд.
Афзалиятҳо соҳаҳоеро ба монанди энергияи сабз, кишоварзӣ, биотехнология, иқтисоди рақамӣ, финтех, стартапҳои инноватсионӣ, зеҳни сунъӣ ва ғайра дар бар мегиранд.
Дар анҷоми мулоқот ҷонибҳо ба таҳияи «харитаи роҳ» оид ба самтҳои афзалиятноки ҳамкорӣ, таъсиси Шӯрои соҳибкорон ва ҷорӣ намудани низоми бидуни раводид байни Ӯзбекистон ва Ҳонконг дар асоси баробарӣ дар муҳлати наздик ба мувофиқа расиданд.
