Лоиҳа дар ҳамкорӣ бо корхонаи “VR Plast”-и Русия дар майдони 4 ҳазору 200 метри мураббаъ амалӣ гардидааст. Арзиши умумии он 5,4 миллион долларро ташкил медиҳад.
Дар корхона озмоишгоҳи муосир ва хатҳои инноватсионии истеҳсолӣ роҳандозӣ шудаанд. Алҳол ин корхона дар самти истеҳсоли гранулаҳои термопластикии эластомерӣ ва маҳсулоти тайёр аз онҳо ҳамчун яке аз истеҳсолкунандагони пешсафи маҳаллӣ фаъолият мебарад.
Дар ин ҷо термоэластомерҳои баландсифат, зичкунандаҳо барои дару тирезаҳо, шлангҳои барои соҳаҳои техникӣ ва саноати хӯрокворӣ пешбинишуда, инчунин маҳсулоти гуногуни полимерӣ барои бахшҳои сохтмон ва электротехника истеҳсол мешаванд.
Афзалияти асосии маҳсулоти истеҳсолшаванда дар устуворӣ, тобоварӣ ба деформатсия ва муқовимати баланди онҳо ба таъсири муҳити беруна мебошад. Аз ин рӯ, ин маҳсулот дар соҳаҳои сохтмон, саноати автомобилсозӣ, истеҳсоли маҳсулоти хӯрокворӣ ва электротехника васеъ истифода мешавад.
Дар назди корхона маркази муосири таҳқиқотӣ низ фаъолият мебарад. Дар ин ҷо бо назардошти талаботи бозорҳои Осиё ва Аврупо ретсептҳои нави термоэластопластҳо истеҳсол мегарданд. Ҳамзамон, гранулаҳои тайёр, зичкунандаҳо ва шлангҳои фишорашон баланд дар асоси стандартҳои байналмилалӣ аз озмоиш гузаронида мешаванд.
Дар корхона 58 ҷойи нави корӣ таъсис ёфта, тибқи натиҷаҳои соли гузашта, ба маблағи 103 миллиард сӯм маҳсулот истеҳсол гардид. Ҳамчунин, ба маблағи 5 миллион доллар маҳсулот содир карда шуд.
Боз як натиҷаҳои муҳими фаъолияти корхона иваз намудани маҳсулоти воридотӣ мебошад. Бахусус, соли 2025 ба маблағи 8,5 миллион доллар маҳсулоти ивазкунандаи воридот истеҳсол карда шуд.
Дар оянда корхона ният дорад ҳаҷми истеҳсоли маҳсулотро ба 177 миллиард сӯм ва ҳиссаи содиротро ба 60 фоиз расонад. Дар сурати татбиқи ин нақшаҳо, корхона на танҳо талаботи бозори дохилиро қонеъ менамояд, балки мавқеи худро дар бозорҳои Осиёи Марказӣ ва дигар кишварҳо боз ҳам мустаҳкам хоҳад кард.
