Xorijiy sayyohlar oqimining ijobiy dinamikasi so‘nggi yillarda izchil davom etmoqda. 2023-yilda mamlakatga 6,6 million, 2024-yilda 10 milliondan ortiq, 2025-yil yakunlariga ko‘ra esa 11,7 million xorijiy sayyoh tashrif buyurgan.
Turistik oqimning o‘sishi xalqaro aviaqatnovlar tarmog‘ining kengayishi bilan birga kechmoqda. 2026-yilning yanvar–iyun oylarida O‘zbekiston aeroportlari 8,15 million nafar yo‘lovchiga xizmat ko‘rsatdi. Bu o‘tgan yilning mos davriga nisbatan 16 foizga ko‘p. Ushbu davrda jami 64 831 ta reys (+8 foiz) amalga oshirilib, shundan 47 371 tasi xalqaro reyslar (+12 foiz)ni tashkil etdi.
Xalqaro reyslardan 6,7 million nafar yo‘lovchi foydalangan bo‘lib, bu ko‘rsatkich o‘tgan yilga nisbatan 15,4 foizga oshgan. Aeroportlarda qayta ishlangan yuk va pochta hajmi ham 33 foizga oshib, 51,5 ming tonnaga yetdi.
To‘g‘ridan-to‘g‘ri aviaqatnovlar geografiyasi ham kengaymoqda. 2026-yilda Toshkentga bir qator yangi xalqaro yo‘nalishlar, jumladan, “China Eastern” aviakompaniyasining Shanxaydan, “Asiana Airlines” aviakompaniyasining Seuldan va “Shirak Avia” aviakompaniyasining Yerevandan qatnovlari yo‘lga qo‘yildi. Hududiy aeroportlarda ham ijobiy dinamika kuzatilmoqda: Termizda yo‘lovchi oqimi 52 foizga, Urganchda 24 foizga, Nukusda esa 23 foizga oshdi.
Turizm oqimning o‘sishi joylashtirish vositalari infratuzilmasining rivojlanishi bilan ham hamohang kechmoqda. 2026-yilning yanvar–iyul oylarida mamlakatda 22 296 o‘rinli 705 ta yangi joylashtirish vositasi tashkil etildi. Natijada ularning umumiy soni 7 440 taga, o‘rinlar soni esa 202,6 mingtaga yetdi.
Turizm rivojining iqtisodiy samarasi turistik xizmatlardan olinayotgan daromadlarning o‘sishida ham namoyon bo‘lmoqda. 2026-yilning yanvar–iyul oylarida turistik xizmatlar eksporti hajmi 3 895,7 million AQSh dollarini tashkil etib, o‘tgan yilning mos davriga nisbatan 56 foizga oshdi.
Xalqaro yo‘nalishlar tarmog‘ining kengayishiga so‘nggi misollardan biri “Etihad Airways” aviakompaniyasining Abu-Dabi va Toshkent o‘rtasida to‘g‘ridan-to‘g‘ri aviaqatnovlarni yo‘lga qo‘yishi bo‘ldi. Ilk reys 2026-yil 10-avgust kuni amalga oshirildi. Yangi yo‘nalish ishga tushirilishi munosabati bilan Toshkentdagi mehmonxonalardan birida aviakompaniyaning O‘zbekistondagi faoliyati boshlanishiga bag‘ishlangan qabul marosimi tashkil etildi.
Xalqaro aviaqatnovlar tarmog‘ining kengayishi, joylashtirish infratuzilmasining rivojlanishi va investitsiyalarni jalb etish xorijiy turizm oqimini yanada oshirish uchun qo‘shimcha shart-sharoitlar yaratmoqda. Soha ustuvor yo‘nalishlari qatorida mamlakatning transport jihatdan qulayligini oshirish, yangi turistik mahsulotlarni rivojlantirish, xizmatlar sifatini yaxshilash hamda hududlarda investitsiya loyihalarini amalga oshirish muhim o‘rin tutadi.
Shunday qilib, xorijiy turizm oqimining o‘sishi sohaning asosiy ko‘rsatkichlarida ham ijobiy dinamika bilan kuzatilmoqda:
Xorijiy sayyohlar soni — 22,6 foizga o‘sish;
Turistik xizmatlar eksporti — 56 foizga o‘sish;
Aeroportlar yo‘lovchi oqimi — 16 foizga o‘sish.
Ushbu ko‘rsatkichlarning umumiy ijobiy dinamikasi turizmning O‘zbekiston iqtisodiyotidagi o‘rni tobora ortib borayotganini hamda sohani yanada rivojlantirish uchun katta salohiyat mavjudligini tasdiqlaydi.
