Kotibiyat maʼlumotiga ko‘ra, hujjatni tashkilot bosh kotibi Nurlan Yermekbayev va Laos bosh vazirining o‘rinbosari, tashqi ishlar vaziri Txongsavan Fomvixan imzoladi.
Shu munosbat bilan o‘tkazilgan uchrashuvda Nurlan Yermekbayev Laos tomonini yangi maqomning rasmiylashtirilgani bilan tabriklab, Vyentyan tashkilotning ko‘p qirrali kun tartibini amalga oshirishda faol ishtirok etishiga ishonch bildirdi. Bosh kotib, shuningdek, suhbatdoshiga ShHT faoliyatining dolzarb masalalari va tashkilotning Bishkekda bo‘lib o‘tadigan navbatdagi sammitiga ko‘rilayotgan tayyorgarlik jarayoni haqida so‘zlab berdi.
O‘z navbatida, Laos TIV rahbari ShHTning xalqaro maydondagi rolini yuqori baholab, mamlakati tashkilot doirasidagi hamkorlikka katta ahamiyat berayotganini taʼkidladi. Tomonlar imzolangan memorandumni hayotga tatbiq etish bo‘yicha amaliy qadamlarni hamda ShHT va ASEAN o‘rtasidagi sheriklik masalalarini ham muhokama qildi.
Tantanali marosimda ShHTga aʼzo davlatlarning tashkilot Kotibiyati huzuridagi doimiy vakillari, Xitoyda akkreditatsiyadan o‘tgan elchilar, aʼzo mamlakatlar va muloqot bo‘yicha sheriklar diplomatik missiyalarining xodimlari ishtirok etdi.
Taʼkidlash joizki, bugungi kunda Belarus, Hindiston, Eron, Qozog‘iston, Xitoy, Qirg‘iziston, Pokiston, Rossiya, Tojikiston va O‘zbekiston SHHTga aʼzo davlatlar hisoblanadi.
Laosning qo‘shilishidan keyin ShHTning muloqot bo‘yicha sheriklari soni o‘n beshtaga yetdi. Ular qatoridan Ozarbayjon, Armaniston, Bahrayn, Misr, Kambodja, Qatar, Kuveyt, Laos, Maldiv orollari, Myanma, Nepal, Birlashgan Arab Amirliklari, Saudiya Arabistoni, Shri-Lanka va Turkiya joy olgan.
