Bu haqda Orol dengizini qutqarish xalqaro jamg‘armasi Boshqaruvi yig‘ilishida mutaxassislar ma’lum qilishdi.
Tadbirni ochar ekan, Qozog‘iston Respublikasi Bosh vazirining o‘rinbosari Qanat Bozumbayev tashkilot o‘zining 33 yilligini nishonlaganini ta’kidladi. Bu vaqt ichida fond noyob va ajralmas mintaqaviy platformaga aylandi. Unga a’zo davlatlar o‘rtasidagi munosabatlar o‘zaro ishonch, hurmat va sheriklikka asoslangan holda davom etmoqda.
“Bu Markaziy Osiyoda suv, ekologik va ijtimoiy-iqtisodiy sohalarda birgalikdagi harakatlarni amalga oshirish imkonini beradi. Mamlakatlarimizning birgalikdagi faoliyati va davlat rahbarlarining siyosiy irodasi tufayli ko‘p ishlar amalga oshirildi. Transchegaraviy suv resurslarini boshqarish va Orol dengizining holatini yaxshilash borasida barqaror hamkorlikni saqlab qoldik”, dedi Q. Bozimbayev.
Shu bilan birga, u ushbu uchrashuv yaqinlashib kelayotgan keng ko‘lamli yig‘ilishga tayyorgarlik ekanligini ta’kidladi. 22-aprelda Astanada OQXJga a’zo davlatlari rahbarlari kengashi yig‘ilishi bo‘lib o‘tadi.
Yig‘ilishda Qozog‘iston Respublikasi Suv resurslari va irrigatsiya vaziri Nurjan Nurjigitov, Tojikiston Respublikasi Bosh vaziri o‘rinbosari Sulaymon Ziyozoda, Turkmaniston Vazirlar Mahkamasi raisi o‘rinbosari Tangriguli Ataxalliyev, O‘zbekiston Respublikasi Prezidenti maslahatchisi Shuhrat G‘aniyev, O‘zbekiston Respublikasi Suv xo‘jaligi vaziri Shavkat Hamrayev, Qirg‘iziston Respublikasi Suv resurslari, qishloq xo‘jaligi va qayta ishlash sanoati vaziri o‘rinbosari - Vazirlik qoshidagi Suv resurslari xizmati direktori Almaz Jeenaliyev, Orolni qutqarish xalqaro jamg‘armasi Ijroiya qo‘mitasi raisi Asxat Orazbay ishtirok etdi.
Qozog‘iston Respublikasi Suv resurslari va irrigatsiya vazirligi ma’lumotlariga ko‘ra, Orol dengizini saqlab qolish bo‘yicha keng qamrovli dastur amalga oshirilmoqda. Davlatlararo kelishuvlarga qat’iy rioya qilish natijasida so‘nggi uch yil ichida Shimoliy Orol dengiziga 6 milliard kubometrdan ortiq suv quyildi. Dengizdagi suv hajmi 2022-yilda 18,9 milliard kubometrga, 2025-yil oxiriga kelib esa 23 milliard kubometrga yetdi.
Bu yo‘nalishdagi ishlar davom ettiriladi. Qozog‘iston Respublikasi Suv resurslari va irrigatsiya vazirligi Turkiston va Qizilo‘rda viloyatlarida sug‘orish tizimlarini yangilash va avtomatlashtirish bo‘yicha 160 ta loyiha-smeta hujjatlarini ishlab chiqmoqda, deb xabar berdi kazinform.
Bundan tashqari, vazirlik Jahon banki ko‘magida Ko‘karal to‘g‘onini yangilashni rejalashtirmoqda. Buning natijasida Boltiqbo‘yi tizimi bo‘ylab dengiz sathi 44 metrga ko‘tarilishi kutilmoqda. Suv hajmi esa 34 milliard kubometrga yetadi.
