Tomonlar ikki tomonlama munosabatlar, global iqtisodiyot, global barqarorlik va dunyoning eng yirik ikki iqtisodiyoti o‘rtasidagi savdo nizolarini muhokama qilishlari kutilmoqda. Xitoy rasmiylari Trampning Xitoyga tashrif buyurishini rasman tasdiqladi. Bu o‘n yil ichida birinchi marta bo‘ladi. Xitoy Tashqi ishlar vazirligi vakili Go Szyakunning so‘zlariga ko‘ra, ikki yetakchi Xitoy-AQSh munosabatlarining asosiy masalalari bo‘yicha "chuqur fikr almashish", shuningdek, tinchlik va global rivojlanish masalalarini muhokama qiladilar. Tramp bilan birga Xitoyga AQShning yirik korporatsiyalari rahbarlari, jumladan Boeing, Citigroup va Qualcomm kelishi mumkin. Muzokaralar ikki mamlakat o‘rtasidagi keskin savdo munosabatlari fonida o‘tkazilishi ta’kidlandi. 2025-yil bahorida Tramp ma’muriyati bir nechta mamlakatlarga katta import tariflarini e’lon qildi, bu esa AQSh va Xitoy o‘rtasida savdo keskinliklarining yangi to‘lqinini keltirib chiqardi. Bunga javoban tomonlar bir-biriga 100% dan yuqori darajada tariflar joriy qilishdi va o‘tgan yil oktabr oyida Janubiy Koreyaning Pusan shahrida davlat rahbarlari uchrashuvidan so‘ng ba’zi cheklovlar vaqtincha bekor qilindi. Bo‘lajak muzokaralar mamlakatlar o‘rtasidagi savdo bitimini saqlab qolish uchun hal qiluvchi sinov sifatida qaralmoqda.