Mahalliy OAV ma'lumotlariga ko‘ra, gaz portlashi Liushenyu Coal Mine konida sodir bo‘lgan, deb yozadi BBC.
Mazkur kon Tongzhou Group kompaniyasi tomonidan boshqariladi.
Hodisa juma kuni mahalliy vaqt bilan soat 19:29 da yuz bergan. Portlash paytida konda 247 nafar ishchi navbatchilik qilayotgani aytilmoqda.
Voqea joyiga yuzlab qutqaruvchilar yuborilgan. Davlat televideniyesi tarqatgan kadrlarda tez yordam xodimlari jabrlanganlarni zambilda olib chiqayotgani, hududda ko‘plab tez yordam mashinalari turgani aks etgan. Ma'lumotlarga ko‘ra, 100 dan ortiq kishi shifoxonaga yotqizilgan, qidiruv-qutqaruv ishlari esa davom etmoqda.
Si Jinping hodisadan so‘ng yaradorlarni davolash va tirik qolganlarni qidirish ishlarida barcha imkoniyatlarni safarbar qilishga chaqirdi. Shuningdek, u fojia sabablarini chuqur o‘rganish va aybdorlarni javobgarlikka tortish bo‘yicha topshiriq berdi.
Davlat OAV xabariga ko‘ra, kon rahbariyati va mas'ullari qo‘lga olingan. Hozircha portlashning aniq sababi ochiqlanmagan. Biroq kon ichidagi uglerod oksidi miqdori me'yordan oshib ketgani aniqlangani ma'lum qilingan.
China Ministry of Emergency Management qutqaruv ishlariga 6 ta maxsus guruhdan iborat 345 nafar mutaxassisni jalb qilgan.
Shanxi provinsiyasi Xitoyning asosiy ko‘mir qazib olish hududlaridan biri hisoblanadi. 2000 yillar boshida mamlakatdagi ko‘mir konlarida halokatli avariyalar tez-tez kuzatilgan. So‘nggi yillarda xavfsizlik standartlari kuchaytirilganiga qaramay, bunday hodisalar hamon sodir bo‘lib turibdi.
2023 yilda Inner Mongolia hududidagi ochiq ko‘mir koni qulab tushishi oqibatida 53 kishi halok bo‘lgan edi. 2009 yilda esa Heilongjiang provinsiyasidagi kon portlashi 100 dan ortiq insonning umriga zomin bo‘lgan.
