Әлемде фармацевтика өнеркәсібі кеңейіп, дәрілік заттардың жаңа түрлері пайда болуда. Бұл олардың сапасын үнемі қадағалап отыруды, жанама әсерлерін анықтауды және талдауды қажет етті.
Сондықтан 23 қаңтарда Президенттің «Фармацевтика саласын реттеу жөніндегі қосымша шаралар туралы» Жарлығы қабылданды.
Оған сәйкес, дәрі-дәрмек пен медициналық бұйымдарды өндіретін және сататын ұйымдар да осы өнімдердің сапасы мен қауіпсіздігіне жауапты. Осының негізінде оларға қатысты мемлекеттік бақылауды жүзеге асырудың арнайы ережелері белгіленеді.
Дәрілік заттарды тұтынуға байланысты тәуекелдерді жедел анықтауға және әрекет етуге бағытталған жүйе құрылады. Ол үшін «Қажетті фармакологиялық бақылау тәжірибесі – GVP» стандарты енгізіліп, Денсаулық сақтау министрлігінде дәрілік заттардың жанама әсерлері туралы электронды деректер базасы құрылады. Бұл туралы ақпарат медицина қызметкерлері мен тұрғындарға жедел жеткізілетін болады.
Дәрілік заттар мен медициналық мақсаттағы бұйымдарды сақтайтын кедендік және еркін қоймалар кезең-кезеңімен «Қажетті сақтау тәжірибесі – GSP» қағидаларының талаптарына сәйкестендірілетін болады. Фармацевтикалық желіні дамыту агенттігі жанындағы Қажетті тәжірибелер орталығы мемлекеттік кәсіпорын болып қайта құрылады.
Дәрілік заттар мен биологиялық белсенді қоспаларды телерадио арналар арқылы жарнамалау Денсаулық сақтау министрлігінде құрылатын арнайы кеңестің қорытындысы бойынша мүмкін болады.
Мемлекет басшысы бұл саланың халық денсаулығы мен экономикасындағы маңыздылығына тоқталып, жарлықты тиімді жүзеге асыру жөнінде қосымша тапсырмалар берді.
