2017 жылдан бері Өзбекстан экономикасына барлық қаржы көздерінен 188 миллиард доллар инвестиция тартылған. Оның 87 миллиард доллары шетелден тартылған қаражат. Нәтижесінде, инвестициялардың жалпы ішкі өнімдегі үлесі 30 пайыздан асып, тұрақты экономикалық өсімге негіз қаланды.
Биыл экономикаға салынған инвестиция көлемі 1,3 есеге артып, 36 миллиард доллардан асты. Осы қаражат есебінен жыл басынан бері құны 70 триллион сумды құрайтын 560 ірі және орта жоба іске қосылды. Бұл келесі жылдан бастап экспортты қосымша 1 миллиард долларға арттыруға мүмкіндік береді.
Салалар мен аймақтарда ашылып жатқан мүмкіндіктер арқылы бұл көрсеткіштерді одан әрі арттыруға болады.
Жиында Инвестициялар, өнеркәсіп және сауда министрі 2025 жылға арналған жоспарлар туралы баяндама жасады.
Келесі жылы 43 миллиард доллар көлемінде инвестиция игеру жоспарлануда. Бұл арқылы 300-ден астам ірі жоба жүзеге асырылып, импортты алмастыратын 662 жаңа өнім түрін өндіру көзделген.
Мемлекет басшысы осы мақсаттарға жету үшін шетелдік инвесторлармен мақсатты түрде жұмыс істеп, қосымша қолайлы жағдайлар жасау және барлық келісімдерді жоғары деңгейде орындау қажеттігін атап өтті.
Сонымен қатар, қазіргі уақытта 1890 жоба бойынша жұмыс жүргізіліп жатыр. Оларды жеделдету үшін жауапты тұлғалар белгіленді.
Жиында сыртқы сауда мәселелеріне де назар аударылды.
Әлемдегі күрделі жағдайларда бұл процестер өздігінен орындалмайды. Экспорттық-логистикалық тізбектер қиындап, негізгі экспорттық нарықтарда дайын өнімге сұраныс төмендеп жатыр.
Осындай жағдайда ішкі мүмкіндіктерді толықтай пайдаланып, экономикалық даму қарқынын арттыру қажет екені айтылды.
2030 жылға дейін еліміздің жылдық экспорт көлемін 2 есеге арттырып, 45 миллиард долларға жеткізу мақсаты қойылған. Бұл мақсатқа жету үшін инвестициялық жобаларды уақытылы іске қосып, жоғары қосымша құны бар өнімдер мен қызмет түрлерін көбейту және экспорт географиясын кеңейту қажет.
Жауапты тұлғаларға жоспарлардың орындалуын тұрақты түрде талдап, жұмыстарды жергілікті жерлерде сапалы ұйымдастыру туралы тапсырмалар берілді.
