Кездесуге АҚШ Мемлекеттік хатшысының көмекшісі Эрик Мейер, Америка-Өзбекстан сауда палатасының төрайымы Кэролин Лэмм, Халықаралық даму қаржы корпорациясының вице-президенті Брез Бетани, сондай-ақ «Boeing», «FLS», «Visa», «NASDAQ», «Air Products», «Franklin Templeton», «Morgan Stanley», «Coca-Cola» және басқа да ірі корпорациялардың басшылары қатысты.
Мемлекет басшысы бұл кездесу АҚШ бизнесінің Өзбекстанда өз қызметін кеңейтуге деген қызығушылығы артып келе жатқанын білдіретінін ерекше атап өтті.
Кездесуде инвестициялық және инновациялық ынтымақтастық келешегіне, стратегиялық маңызы бар шикізат көздерін игеру мен қайта өңдеу, жасанды интеллект пен цифрлық технологиялар, көлік және энергетикалық инфрақұрылымды жаңғырту, ауыл шаруашылығы, туризм және басқа салалардағы нақты жобаларды ілгерілетуге баса назар аударылды.
АҚШ-тың жетекші компанияларының басшылары инвесторлардың тиімді қызметі үшін жасалып жатқан қолайлы жағдайлар үшін Өзбекстан Президентіне алғыс айтып, өздерінің нақты ұсыныстары мен жоспарларын ортаға салды.
