Жиынға Қауіпсіздік Кеңесінің мүшелері, Өзбекстан Республикасы Қарулы Күштерінің құрамындағы министрлік және ведомстволарының басшылары, округ қолбасшылары, әскери-әкімшілік секторлардың басшылары – Қарақалпақстан Республикасы Жоқорғы Кеңесінің Төрағасы, облыстар және Ташкент қаласы әкімдері, қоғамдық ұйымдардың өкілдері қатысты.
Жиын басында Мемлекет басшысы 2023 жылы Өзбекстан қорғаныс қабілетін одан әрі нығайту және Қарулы Күштерді дамыту бойынша атқарылған жұмыстардың нәтижелерін саралады.
Министрлік пен ведомстволар, жергілікті мемлекеттік органдардың осы бағыттағы қызметі сынға алынып, басшылардың есебі тыңдалды.
Әскери қызметкерлер мен жастарды патриоттық рухта тәрбиелеу жүйесін жетілдіру, ұлттық армиямызды одан әрі дамыту және еліміздің қорғаныс қабілетін нығайту, әскери-әкімшілік секторлар мен қорғаныс өнеркәсібі саласының тиімділігін арттыру мәселелері талқыланды.
Жаһандану процестері күшейіп, адамдардың, әсіресе, жас ұрпақтың жүрегі мен санасы үшін күрес жүріп жатқан қазіргі аса күрделі жағдайда әскери-патриоттық рухта тәрбиенің рөлі мен маңызы артып отырғаны баса айтылды.
- Бүгінгі таңда әрқайсымыз Отан қорғаушы болып, жастарымызды осы рухта тәрбиелеуіміз қажет, - деді Президент.
Осы орайда Мемлекет басшысы жастарды әскери-патриоттық рухта тәрбиелеу жүйесін қайта қарауға қатысты тиісті басшыларға нақты тапсырмалар берді. Өскелең ұрпақ өкілдерінің елдегі реформалар үдерісіне қатысуын арттыру, олардың интеллектуалдық және шығармашылық әлеуетін жүзеге асыру үшін жағдай жасау маңыздылығына назар аударды.
Қазіргі таңда Қарулы Күштердің заманауи инфрақұрылымы негізінде және моноорталықтарда жастарды әскери-патриоттық рухта тәрбиелеу жұмыстары қолға алынды. Мемлекет басшысы осы бағыттағы іс-шараларды кеңейтіп, жастарды заманауи мамандықтарға оқытып, жұмысқа кірісу үшін субсидиялар арқылы қолдау көрсету қажеттігін атап өтті.
Сондай-ақ, жастардың азаматтық ұстанымын нығайту мақсатында медиа кеңістігінде жүргізіліп жатқан әскери-патриоттық жұмыстарды күшейту міндеті қойылды.
Жиында Өзбекстан қорғаныс қуатын нығайту, әскерлердің әскери дайындығын арттыру және әскери ғылымды дамыту мәселелері де сөз болды. Бас қолбасшы инновациялық және ғылыми тәсілдерге негізделген жауынгерлік даярлық жүйесін одан әрі жетілдіру, ақпарат алмасу мен шешімдер қабылдауда заманауи әскери және ғылыми әзірлемелерді кеңінен енгізу туралы тапсырмалар берді.
Мәжілісте ақпараттық қауіпсіздік пен киберқауіпсіздікті қамтамасыз ету ұлттық қауіпсіздік саласындағы маңызды міндет болып қала беретіні баса айтылды.
Осыған байланысты Қарулы Күштер мен құқық қорғау органдарын цифрландыруды жеделдету, министрліктер мен ведомстволардың барлық ақпараттық ресурстарын біртұтас қорғалған ақпараттық кеңістікке біріктіру қажеттігі көрсетілді.
Ұлттық армиямызда және халқымыз арасында киберқауіпсіздік жайындағы хабардарлық және цифрлық мәдениетті арттыру бойынша жүйелі жұмысты жолға қою бойынша аса маңызды міндеттер белгіленді.
Қауіпсіздік Кеңесінің отырысында Өзбекстанның қорғаныс өнеркәсібі кешенін одан әрі дамытуға, мемлекеттік шекараны күзету жүйесін жетілдіруге, халықтың қауіпсіздігін қамтамасыз етуге, төтенше жағдайларды болжау мен мониторингіне, сондай-ақ апаттар мен техногендік апаттардың алдын алу жөніндегі жұмыстың тиімділігін арттыруға қатысты кезек күттірмейтін міндеттер қойылды.
Президент әскери қызметшілерді және олардың отбасы мүшелерін әлеуметтік қолдау мен қамқорлық мемлекеттік саясаттың маңызды бағыты болып қала беретінін атап өтті.
Жиын соңында Мемлекет басшысы барлық әскери қызметшілерді және халқымызды Өзбекстан Республикасы Қарулы Күштерінің құрылғанына 32 жыл және Отан қорғаушылар күнімен шын жүректен құттықтап, ізгі тілегін білдірді.
