Беларусь Президенті Александр Лукашенконың төрағалығымен өткен саммитке Армения премьер-министрі Никол Пашинян, Молдова премьер-министрі Наталья Гаврилица, Әзірбайжан Президенті Ильхам Әлиев, Ресей Президенті Владимир Путин, Тәжікстан Президенті Эмомали Рахмон, Түркіменстан Президенті Гурбангулы Бердімұхамедов, Қырғызстан Президенті Садыр Жапаров, Қазақстан Президенті Қасым-Жомарт Тоқаев және ТМД Атқару комитетінің төрағасы - жауапты хатшы Сергей Лебедев қатысты.
Күн тәртібіне сәйкес делегация басшылары соңғы 30 жылдағы көпжақты ынтымақтастықтың дамуы мен жетістіктері туралы пікір алмасты, экономикалық, құқықтық, мәдени-гуманитарлық салалардағы ынтымақтастықты одан әрі кеңейту және аймақтағы тұрақтылық пен қауіпсіздікке қауіп төндіретін қазіргі заманғы қатерлермен күресу мәселелері қаралды.
Мемлекет басшысы өз сөзінде ТМД аясындағы серіктестікті нығайтудың маңызды бағыттары туралы өз пікірін білдірді.
Достастық елдерінде тұрақты экономикалық дамуды қамтамасыз ету маңызды екені баса айтылды.
Пандемия салдары әсер ететін қазіргі уақытта сауда-экономикалық серіктестік оң қарқынмен дамуда. Атап айтқанда, ағымдағы жылдың басында Өзбекстанның ТМД-дағы серіктестері арасындағы екіжақты тауар айналымының көлемі отыз пайызға жуық өсті. Сонымен қатар тауар айналымы сан жағынан да, сапа жағынан да өсуде.
Бұл ретте Достастықтағы еркін сауда аймағы ерекше және шектеусіз толық жұмыс істеуі тиіс екендігі айтылды. Осыған байланысты кешенді талдау негізінде одақ аясындағы сауда саясатын одан әрі ырықтандыру бойынша ұсыныстар әзірлеу керек екені айтылды.
Бірлескен жобаларды толық қолдау және ұзақ мерзімді бизнес-жобаларды іске асыру мақсатында Өзбекстан Президенті 2022 жылы ТМД-ның экономикалық күн тәртібіндегі маңызды мәселе ретінде өндірістік кооперацияның дамуын анықтауды ұсынды.
Бүгінде Өзбекстанның бастамасымен тиісті ұзақ мерзімді ынтымақтастық бағдарламасы дайындалуда. Келесі жылы Өзбекстанда Достастық елдерінің өндірістік кооперациясы бойынша форум мен көрме өтеді.
Мемлекет басшысы аймақаралық және құрлықаралық көлік дәліздерінің тиімді жүйесін, оның ішінде тарифтерді төмендету мен рәсімдерді жеңілдету арқылы одан әрі дамыту қажеттігін айтты.
Өзбекстан бірлескен инновациялық бағдарламаларды белсенді түрде ілгерілету мен жас кәсіпкерлер қатысатын стартап-жобаларды қолдауды жақтайды. Достастық елдерінің технологиялары мен IT парктері арасындағы ынтымақтастық бағдарламасын әзірлеу туралы бастама көтерілді.
ТМД Экономикалық Кеңесінің қызметіне елдердің іскерлік топтары мен аймақтардың өкілдерін тарту арқылы нығайту маңызды екені сөз болды.
Кездесуде климаттың өзгеруіне қарсы күреске және «жасыл» күн тәртібін ілгерілетуге, биологиялық қауіпсіздікті қамтамасыз етудегі күштерді біріктіру, еңбек нарығын жақсарту, туристер ағынын қалпына келтіру және мәдени-гуманитарлық алмасуды кеңейтуге ерекше назар аударылды.
Сонымен қатар, Өзбекстан Президенті Ауғанстандағы жағдай туралы айта отырып, ауған халқына гуманитарлық және экономикалық көмекті жалғастыру қажеттігін айтты.
Бұл ретте терроризм мен есірткі бизнесіне қарсы күресте ынтымақтастықты нығайту қажеттілігі сөз болды.
Мемлекет басшысы сөзінің соңында Өзбекстан ТМД халықтарының әл-ауқаты үшін әріптестікте нақты нәтижелерге қол жеткізу үшін сындарлы диалог пен тығыз ынтымақтастықты жалғастыруға дайын екенін растады.
Саммит қорытындысына орай ұйымның 30 жылдығына байланысты мәлімдеме, биологиялық қауіпсіздік, көші-қон саласындағы ынтымақтастық туралы мәлімдемелер, Жоғарғы Сот өкілдерінің кеңесін құру туралы келісім және басқа да бірқатар көпжақты ынтымақтастықтың бағыттарын қамтыған маңызды құжаттар қабылданды.
