Мемлекет басшысын қарсы алған Пәкістан Премьер-Министрі Өзбекстанмен ынтымақтастықты дамыту Пәкістан үшін басым бағыт болып табылатынын атап өтті.
Кездесуде екі ел арасындағы стратегиялық әріптестікті нығайту, саяси, сауда-экономикалық және инвестициялық ынтымақтастықты дамыту мәселелері талқыланды.
Кейінгі жылдары қарым-қатынас әлдеқайда белсенді бола түсті. Сондай-ақ, екі елдің тиісті министрліктері мен ведомстволары, облыс басшылары тұрақты диалогта болып, жоғары деңгейде қол жеткізілген келісімдерді жүзеге асыруда.
Пандемия жағдайына қарамастан, байланыстар барлық салада дамып келеді. Атап айтқанда, 2021 жылы екіжақты тауар айналымы 50 пайызға дерлік өсті. Биылғы жылдың басынан бері тағы 70 пайызға өсім байқалды. Бүгінде Өзбекстанда пәкістандық инвесторлар құрған 177 кәсіпорын жұмыс істейді.
Өзбекстан Президентінің сапары қарсаңында Исламабадта Үкіметаралық комиссияның отырысы, бизнес-форум және саяси консультациялар өтті.
Кездесуде Шавкат Мирзияев пен Имран Хан осы оқиғалардың нәтижелерін талқылады. Өткен жылдармен салыстырғанда сауда-экономикалық және инвестициялық келісімдердің көлемі ұлғайғанымен, әлі де пайдаланылмай жатқан мүмкіндіктер бар екені айтылды.
Өңірлік және халықаралық маңызы бар мәселелер бойынша пікір алмасу барысында тараптардың ұстанымдарының бірдей немесе ұқсас екендігі расталды.
Өзбекстан мен Пәкістан халықаралық аренада, соның ішінде Біріккен Ұлттар Ұйымы, Шанхай Ынтымақтастық Ұйымы, Ислам Ынтымақтастық Ұйымы және Экономикалық Ынтымақтастық Ұйымы аясында бір-бірін қолдап келуде.
Ауғанстандағы гуманитарлық жағдайдың нашарлауы жақын көршілері ретінде Өзбекстан мен Пәкістанды қатты алаңдатып отыр. Бұл елге гуманитарлық көмек көрсетуге әлемдік қоғамдастықтың назарын күшейтудің маңыздылығы сөз болды.
Имран Хан Өзбекстан Президенті ұсынған Урду-өзбек сөздігін үлкен қуанышпен қабылдады. Онда өзбек және урду тілдерінде бір мағыналы 3 мыңнан астам сөз бар.
