Іс-шара барысында Мемлекет басшысы үш жыл бұрын болған жойқын жер сілкінісінің бауырлас түрік халқы үшін ауыр сынақ болғанын атап өтті. Өзбекстан осы қайғылы кезеңнің алғашқы күндерінен бастап Түркияға жан-жақты көмек көрсете бастады.
Қысқа уақыт ішінде апат аймағына 100 өзбекстандық құтқарушы мен 70 медицина қызметкері жетті. Іздеу-құтқару жұмыстарының нәтижесінде 18 адам аман құтқарылып, 200-ге жуық зардап шеккен азамат үйінді астынан шығарылды. Далалық аурухана 4 мың науқасқа медициналық көмек көрсетті.
Сондай-ақ Президент Режеп Тайып Ердоғанның бастамасымен жер сілкінісінің салдарын жоюға бағытталған ауқымды бағдарламалар жүзеге асырылып жатқаны ерекше атап өтілді. Бүгінгі күнге дейін елде 455 мыңнан астам тұрғын үй салынды.
Өз кезегінде Өзбекстан қысқа мерзім ішінде Хатай провинциясының Арсуз ауданында 300-ден астам толық жабдықталған пәтерден тұратын, жалпы 24 көпқабатты үйді қамтитын, барлық қажетті инфрақұрылымы бар заманауи тұрғын үй кешенін салды.
Түркия Президенті бұл кешеннің тек апаттан зардап шеккен отбасылар үшін жаңа баспана ғана емес, сондай-ақ өзбек пен түрік халықтары арасындағы мәңгілік достықтың жарқын үлгісі екенін атап өтті.
Екі елдің көшбасшылары жобаны жүзеге асыруға атсалысқан құрылысшыларға, инженерлерге, жұмысшыларға және барлық серіктестерге шынайы ризашылықтарын білдірді.
Мемлекет басшылары жаңа пәтерлердің кілттерін олардың иелеріне салтанатты түрде табыс етті.
Сонымен қатар Президенттер Ыстанбұл қаласының «Бекиркёй» ауданында өзбек мектебінің құрылысына ресми түрде бастау берді. Аталған білім ордасы Өзбекстанның шетелдегі алғашқы оқу орны болмақ.
Жаңа оқу орны Түркияда тұратын өзбек отбасыларының балаларына ана тілінде білім алумен қатар ұлттық құндылықтарды, мәдениет пен салт-дәстүрді сақтауға мүмкіндік береді.
Тараптар бұл мектеп екі бауырлас халық арасындағы байланысты одан әрі нығайтып, жас ұрпақ үшін маңызды білім мен тәрбие орталығына айналатынына сенім білдірді.
