Бұған дейін бұл аурухананың ғимараттары мен жұмыс әдістері ескі еді. Мемлекет басшысы 2018 жылы осында келіп, оны қайта жаңғыртуға, заманауи жабдықтармен жабдықтауға тапсырма берген болатын. Соның негізінде ауқымды құрылыс-жөндеу жұмыстары жүргізілді. Медициналық құрал-жабдықтар мен керек-жарақтар жаңартылды. Басқаруда клиникалық менеджмент енгізілді.
Аурухана жалпы 700 төсек орынға арналған болып, онда әскери қызметкерлер, олардың отбасы мүшелері, сала ардагерлер тегін емделеді. Сондай-ақ, басқа науқастарға да ақылы қызмет көрсетіледі. Осы мақсатта 286 түрлі диагностикалық тексерулер, 600-ден астам тәжірибелер жолға қойылып, 30-ға жуық мамандандырылған бөлімшелер құрылған.
Атап айтқанда, хирургия бөлімшелері үшін 8 қабатты жаңа ғимарат салынды. Мемлекет басшысы осындағы жағдаймен танысты. Мұндай ауруханаларды аймақтарда да ашу керектігі айтылды. Әскерилерден бөлек спортшылар мен әйелдерді емдеуге қатысты ұсыныстар жасалды.
Білім мен тәжірибе арасындағы байланыс та тиімді жолға қойылған. Бұрын мұндай мамандар Ташкент медицина академиясының әскери медицина факультетінде дайындалатын еді. Президенттің 2020 жылғы 22 қазандағы «Әскери медицина саласында кадрлар даярлаудың сапалық жаңа жүйесін құру жөніндегі шаралар туралы» қаулысына сәйкес осы факультеттің негізінде Өзбекстан Республикасы Қарулы Күштерінің Әскери-медициналық академиясы құрылды.
Маңыздысы, бұл оқу орнының Орталық әскери клиникалық госпитальдің жанынан салынғаны. Президент мұндағы жағдаймен танысты.
Академия 250 студент пен тыңдаушыға арналған. Мұнда болашақ әскери дәрігерлер дайындалып, медицина қызметкерлері қайта даярланады. Оқу ғимаратында 2 факультет, 5 кафедра, 2 орталық, институт және басқарма орналасқан. Бөлмелерде оқу мен жаттығу үшін барлық жағдай жасалған. Сондай-ақ 186 орындық жатақхана да бар.
Мемлекет басшысы академиядағы білім мазмұнына ерекше көңіл бөлді.
– Ғимарат пен мұндағы жағдай жақсы, бірақ бұл бастамасы ғана. Енді ең бастысы – әскери медицинаның мән-мағынасын түсініп, оқуды дұрыс жолға қою керек. Ол үшін шетелдік тәжірибеге негізделген педагогикалық, ғылыми және тәжірибелік жүйені құру қажет. Бұл жүйе басқа медициналық жоғары оқу орындарына балама және бәсекелес, түлектер өз саласында үлгі болуы керек, – деді Шавкат Мирзияев.
Академияда шетелдік менеджментті енгізу, алғашқы түлектерді Түркия, Оңтүстік Корея сияқты елдерге оқуға жіберу жөнінде тапсырмалар берілді.
