Бұл туралы Фарғона облыстық Төтенше жағдайлар басқармасының ақпарат қызметі хабарлады.
Айтылуынша, ағымдағы жылдың 27 наурыз күні шамамен сағат 16:30-да «Гулистон» МАЖ аумағынан ағып өтетін Оңтүстік Фарғона каналының маңында өз жерін суару мақсатында жүрген азамат Раҳмонов Дилмурод Эргашевич каналға өзін тастаған әйелді байқап қалған.
Ол бір сәт те ойланбастан адам өмірін сақтап қалу мақсатында суға түсіп, әйелді құтқарып қалған.
Құтқарылған азаматша өзін таныстырудан және тұрғылықты мекенжайын жария етуден бас тартқан. Соған қарамастан, Дилмурод оны дереу Қува аудандық медициналық бірлестігіне жеткізіп, жағдай туралы аудандық ішкі істер бөліміне хабар берген.
Жасалған ерлік пен адамгершілік әрекеті жоғары бағаланып, басқарма басшысы, полковник Ғанижон Алавиддинов тарапынан Дилмурод Раҳмонов құрмет грамотасы және қымбат бағалы естелік сыйлықтармен марапатталды. Сондай-ақ, оны тәрбиелеген анасына да құрмет грамотасы мен гүл шоқтары табысталып, ерекше құрмет көрсетілді.
