Жапония Императоры Мемлекет басшысын жылы қабылдап, Өзбекстан Президентінің бұл сапары Өзбекстан–Жапония достығы мен стратегиялық серіктестігін одан әрі нығайту жолындағы маңызды оқиға екенін атап өтті.
Өз кезегінде Мемлекет басшысы Император Нарухитоға терең құрметін білдіріп, Жаңа Өзбекстанда жүзеге асырылып жатқан артқа қайтпас реформаларды тұрақты қолдағаны үшін ризашылығын жеткізді.
Өзбек және жапон халықтары географиялық тұрғыдан бір-бірінен алшақ орналасқанына қарамастан, оларды менталитет, салт-дәстүр мен отбасылық құндылықтардың ұқсастығы, сондай-ақ тамыры Ұлы Жібек жолы дәуіріне барып тірелетін ғасырлар бойғы тарихи байланыстар тоғыстырып тұрғаны атап өтілді.
Екіжақты ынтымақтастықтың, әсіресе білім беру, кадр даярлау және мәдени-гуманитарлық алмасулар саласында жүйелі түрде кеңейіп келе жатқаны айтылды. Бүгінге дейін 3 мыңнан астам өзбекстандық маман Жапонияда тағылымдамадан өтті, 440-тан астамы стипендиялық негізде жоғары білім алған. Өзбекстандағы 7 жоғары оқу орнында жапон тілі оқытылады.
Осы сапар аясында Токио қаласында Өзбекстан мәдениеті күндері табысты өтті. Алдағы жылы Жапонияның бірнеше қаласында Өзбекстанның мәдениеті мен тарихына арналған археологиялық көрме ұйымдастыру жоспарланып отыр.
Кездесу соңында Мемлекет басшысы Император Нарухитоны Өзбекстанға ресми сапармен келуге шақырды.
