Кездесуді ашқан Мемлекет басшысы Франция Президентіне ресми тұлғалардан, жетекші компаниялар басшыларынан, белгілі мәдениет және ғылым қайраткерлерінен құралған ықпалды делегацияның басшылығымен Өзбекстанға келгені үшін ризашылығын білдірді.
– Бұл Өзбекстан-Франция достығы мен көпжақты ынтымақтастық қарым-қатынастарын одан әрі дамыту мен нығайтуға Сіздің жеке назарыңыз бен ерекше көзқарасыңыздың айқын дәлелі, – деді Шавкат Мирзиёев.
Жоғары деңгейдегі тұрақты кездесулердің арқасында екі ел арасындағы қарым-қатынастар жан-жақты сипат алғаны атап өтілді.
Тараптар белсенді саяси қарым-қатынастарды, парламент, үкімет, сыртқы саяси және экономикалық органдардың тұрақты диалогын жалғастыруға келісті.
Есептерге сәйкес, жақын арада 1 миллиард еуроға жетеді деп күтілген тауар алмасу қарқынды дамып жатқаны атап өтілді. Ағымдағы және перспективалық жобалардың портфелі 10 миллиард еуродан асады.
Француздық Orano, EDF, Total, SUEZ, Eiffage, Voltalia, Lactalis, Veolia және басқа да көптеген жетекші компаниялар Өзбекстанда табысты жұмыс істеуде.
Мемлекет басшысы тау-кен өндіру желісін, стратегиялық шикізат ресурстарын өңдеуді, гибридті, күн және жел электр станцияларын салуды, сумен жабдықтау жүйесін жаңғыртуды, «ақылды» ауыл шаруашылығын енгізуді, қала және көлік инфрақұрылымын, туризмді дамытуды ынтымақтастықтың басым бағыты ретінде атап өтті..
Бизнесмендер арасындағы ынтымақтастықты дамыту мақсатында Ташкентте Өзбекстан-Франция Сауда палатасы іске қосылып, «Business France» агенттігінің кеңсесі ашылатыны жарияланды.
Гуманитарлық саладағы ынтымақтастықты тереңдету мақсатында үш жылдық бағдарлама қабылдап, оның аясында өзара мәдениет күндерін өткізу ұсынылды.
Тараптар Самарқанд қаласында Франция альянсының филиалының ашылуын құптап, бірлескен жоғары оқу орнын ашуды жеделдету туралы келісті.
Францияның әртүрлі қалаларынан Самарқанд, Бұхара және Хиуаға чартерлік рейстер ұйымдастыру арқылы туристік алмасуды дамыту бағдарламасын әзірлеу бастамасы көтерілді.
Халықаралық күн тәртібіндегі мәселелер, қауіпсіздікке төнетін ортақ қатерлер және қауіп-қатерлерге қарсы күрестегі ынтымақтастықты жалғастыру мәселелері жөнінде пікір алмасылды.
Кездесу соңында Өзбекстан басшысы Франция Президентіне 2024 жылы Парижде жазғы Олимпиада ойындарының сәтті өтуін тіледі.
Мемлекет басшылары барлық қол жеткізілген уағдаластықтарды жүзеге асырудың «жол картасын» дайындауды тапсырды.
