Салтанатты шарада сөз сөйлеген Өзбекстан Президенті Шавкат Мирзияев жобалардың маңыздылығына тоқталып, бұл кешендердің Өзбекстан мен Түркия арасындағы экономикалық ынтымақтастық нәтижелерінің жарқын көрінісі екенін атап өтті. Соңғы бір жылда түрік компанияларымен бірлесе отырып, Өзбекстанның қарқынды дамып келе жатқан экономикасы үшін аса маңызды 5 ірі энергетикалық жоба жүзеге асырылғаны айтылды. Атап айтқанда, бұл станциялардың жалпы қуаты бүгінгі жобаларды қоса есептегенде 1,4 мың мегаваттқа жетеді.
Өзбекстанда энергетика саласын жаңғырту нәтижесінде 2026 жылға дейін мемлекеттік-жекеменшік әріптестік негізінде құны 12 млрд доллар болатын 29 жоба іске қосылады. Олар қосымша 71 миллиард киловатт-сағат электр энергиясын өндіріп, жылына 12 миллиард текше метр табиғи газды үнемдейді.
Мемлекет басшысы электр станциясының құрылысына атсалысқан инженерлер мен құрылысшыларға алғыс айтты. Бұдан кейін Президент Шавкат Мирзияев пен Президент Режеп Тайып Ердоған символдық түймені басып, Ташкент облысындағы жылу электр орталығын іске қосып, Сырдария облысындағы жылу электр станциясының құрылысын бастады.
Ташкент облысындағы ЖЭС-тің қуаты жылына 2 миллиард киловатт-сағат энергия өндіретін 240 мегаватт құрайды.
Сырдария облысындағы жаңа ЖЭС-тің қуаты 220 мегаватт, жылына 1,7 миллиард киловатт-сағат электр қуатын өндіретін болады.
