Нашрнинг ёзишича, Telegram “Россия конституцион тузумига таҳдид шакллантирувчи ахборотни тарқатишнинг асосий манбаси” ҳамда “террорчиларнинг рақамли штаби” деб аталмоқда.
"Бунга мисол сифатида дунё бўйлаб норозилик акциялари пайтида фаолият юритган мувофиқлаштирувчи каналлар ва чатлар, шунингдек, “радикаллар, гиёҳвандлар, қотиллар ва террорчилар армияси”ни тўплаган чатлар келтирилган", дейилади хабарда.
Павел Дуров Россияда ўзига қарши очилган иш ҳақида баёнот берди ва Москвани ўз фуқароларидан қўрқишда айблади.
Telegram асосчисининг маълум қилишича, Россияда унга нисбатан “терроризмга кўмаклашиш” моддаси бўйича иш қўзғатилган. Дуров ўз каналида Россия ҳукумати россияликларнинг мессенжерга киришини чеклаш учун “ҳар куни янги баҳоналар ўйлаб топаётганини” ёзди. У буни “ўз фуқароларидан қўрқадиган давлатнинг ачинарли ҳолати” деб атади.
Россия оммавий ахборот воситаларининг Федерал хавфсизлик хизмати (ФСБ) материалларига таяниб хабар беришича, Дуровга Роскомнадзорнинг тақиқланган контентни ўчириш бўйича 150 мингдан ортиқ талабларига жавоб бермаслик орқали терроризмга кўмаклашиш айби қўйилмоқда. Маълумотларга кўра, иш Россия Жиноят кодексининг 205.1-моддаси 1.1-қисми бўйича очилган бўлиб, у 15 йилгача озодликдан маҳрум этишни назарда тутади.
Россия ҳукумати 2025 йилда Telegram мессенжерида қўнғироқлар функциясини чеклаган, 2026 йил февралида эса унинг ишини секинлаштирган, шундан сўнг мессенжер тўлиқ блокланиши мумкинлиги ҳақида гап-сўзлар пайдо бўлган.
