Давлат хавфсизлик хизмати вилоят бошқармаси томонидан прокуратура, Иқтисодий жиноятларга қарши курашиш департаменти ҳамда Солиқ бошқармасининг комплаенс ва коррупцияга қарши назорат бўлими билан ҳамкорликда ўтказилган тезкор тадбирда қонунбузарлик фош этилди.
Маълум бўлишича, Солиқ бошқармасининг шуъба бошлиғи хизмат ваколатидан фойдаланиб, заргарлик буюмлари савдоси билан шуғулланувчи МЧЖга нисбатан гўёки 1 млрд сўмдан ортиқ маблағни яширгани важи билан 145 млн сўм миқдорида сунъий жарима қўллаш билан таҳдид қилган. У мазкур жаримани қўлламаслик ва келгусида «ҳимоя» қилиб бериш эвазига корхона раҳбаридан 10 млн сўмлик тилла тақинчоқни пора сифатида олган вақтида ашёвий далиллар билан ушланган.
Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
