Эътиборлиси, мазкур соҳадаги олиб борилган ислоҳотлар натижасида мамлакатимизда буйрак кўчириб ўтказиш, жигар ва ўзак ҳужайра амалиётлари йўлга қўйилди. Натижада бугунги кунгача юртимизда 700 дан ортиқ ана шундай операциялар муваффақиятли бажарилди. Шу билан бирга, трансплантация амалиётлари Самарқанд, Наманган, Хоразм ва Сурхондарё вилоятларида ҳам ўтказилди.
Бундан ташқари, юртимизда аҳолига юқори малакали ихтисослаштирилган тиббий ёрдам кўрсатиш, мазкур йўналишда замонавий талабларга жавоб берадиган самарали тизимни шакллантириш мақсадида сўнгги йилларда ихтисослаштирилган марказлар сони 10 тадан 20 тага етказилди. Уларнинг ҳудудларда 174 та филиаллари, туманларда 310 та бўлимлари ташкил этилди. Бунинг натижасида ҳудудлардаги юқори технологик операциялар улуши 55 фоизгача етди.
Шунингдек, авваллари кардиохирургия хизмати фақатгина Тошкент шаҳрида амалга оширилган бўлса, ҳозирда 12 та ҳудудда рентгенэндоваскуляр бўлимлар фаолияти йўлга қўйилди ҳамда 10 та вилоятда очиқ юрак операциялари муваффақиятли ўтказилмоқда.
Қолаверса, жорий йилда телемедицина орқали 9 612 маротаба онлайн боғланишлар ташкил қилиниб, уларда 40 350 нафар беморлар консультация қилинган, 2 850 та консилиумлар, 376 та семинарлар, 590 та маҳорат дарслари, 184 та намойишли жарроҳлик амалиётлари ўтказилди. Ордер бериш тартиби бекор қилиниб, навбат асосида даволаниш тизими жорий этилди.
Соғлиқни сақлаш вазирлиги
Матбуот хизмати.
