Motorola компаниясида ишлаган Мартин Купер 1973 йил 3 апрелда дунёдаги илк мобил телефон қўнғироғини амалга оширди. У рақобатчи Bell Laboratories компанияси раҳбари бўлган таниши Жоэль Энгелга қўнғироқ қилди.
Биринчи “уяли телефон” Motorola DynaTAC 8000Х деб номланган. Қурилманинг оғирлиги деярли бир килограмм бўлиб, батарея қуввати ярим соатлик суҳбатга ҳам етмасди, телефонни қувватлантириш учун 10 соат вақт сарфланган.
Купернинг сўзларига кўра, биринчи мобил телефонлар арзон эмас эди – нархи тахминан 5000 доллар бўлган.
Купернинг фикрича, мобил телефонлар одамлар ҳаётини яхшилашда давом этмоқда. Мутахассиснинг фикрича, бу борада инсоният бу жараённинг фақат бошида турибди. “Биз эндигина бу кашфиёт биз учун нима қилиб бера олиши мумкинлигини тушуна бошлаяпмиз”, деди Купер.
“Келажакда биз мобил телефон таълим соҳасида инқилоб қилишини кутишимиз мумкин, у соғлиқни сақлаш соҳасида инқилоб қилади. Биламан, бу муболаға бўлиб туюлади, лекин шуни билишингизни истардимки, бир ёки икки авлоддан кейин биз ушбу технологиялар ёрдамида касалликни енгамиз. Бир кун келиб телефонлар танага уланган датчиклар мажмуасига уланади, улар хавфли касалликлар пайдо бўлишидан олдин уларни аниқлайди”, – дея ишонч билдирди эксперт.
