Ҳамкорлик масалаларини янада кенгайтириш мақсадида ўтказилган учрашувда ҳам дастлаб IT Parkнинг янги қурилаётган мажмуаси ва «Astrum» IT академияси фаолияти ҳақида тақдимот ўтказилди. Унда АКТ соҳасининг инфратузилмаси тубдан янгиланаётгани, бу эса дунёдаги катта IT компанияларни жалб этиб, IT Parkни яхлит комплекс тарзда ривожлантириш, IT вакиллари учун қулай муҳит яратиш мақсад қилинаётгани тушунтирилди.
Шундан сўнг АКТ вазири Элчини IT Parkнинг янги қурилаётган мажмуаси билан таништирди.
Бу ерда ёшларни етакчи хорижий компанияларга масофадан туриб хизмат кўрсатиш касбига, яъни аутсорсинг (BPO ва KPO) хизматларини кўрсатишга ўргатиш, хорижнинг етакчи IT компанияларини Ўзбекистонга жалб этиш, мамлакатни минтақавий IT марказга айлантириш мақсад қилингани айтиб ўтилди.
Жумладан, АҚШ ва Ўзбекистон ўртасида IT соҳаларида ҳамкорлик янги босқичга чиқаётгани, АҚШ етакчи компанияларини Ўзбекистонга жалб этиш, шунингдек, масофавий хизматлар кўрсатиш аутсорсинг (BPO ва KPO) марказларини ташкил этишда асосий ҳамкор бўлаётгани таъкидланди.
Таништирув жараёнида Ахборот технологиялари ва коммуникацияларини ривожлантириш вазири Шерзод Шерматов Америка Қўшма Штатларининг Ўзбекистондаги фавқулодда ва мухтор элчиси Дэниел Розенблюмга Американинг IT компанияларини Ўзбекистонда минтақавий офисларини очишни таклиф этди, деб хабар беради Ахборот технологиялари ва коммуникацияларини ривожлантириш вазирлиги матбуот хизмати.
