Маълум қилинишича, ички ишлар бошқармасининг пробация гуруҳи инспектори 1989 йилда туғилган маҳкума аёлдан моддий манфаат кўзлаб, тамагирлик йўли билан пул талаб қилган.
Инспектор аёлга гўёки фирманинг қарзи учун икки ой давомида ўз ҳисобидан 800 минг сўм тўлаб келаётганини баҳона қилиб, ундан жами 1 миллион 600 минг сўм олишга уринган.
Бу ҳолатни жиноят сифатида баҳолаган маҳкума аёл Ички ишлар вазирлиги Шахсий хавфсизлик бош бошқармасининг Андижон вилояти бўйича бошқармасига мурожаат қилган.
Мурожаат асосида ўтказилган хизмат текшируви ҳамда махсус йиғилиш натижасида инспекторнинг ноқонуний хатти-ҳаракатлари атрофлича муҳокама қилиниб, у ички ишлар органлари тизимидан ўз хоҳиши билан бўшатилган.
Таъкидланишича, хизмат интизомига зид бўлган мазкур ҳолат барча ходимлар иштирокида кўриб чиқилиб, қонун устуворлиги ва тизимда ҳалоллик тамойилларига қатъий амал қилиниши яна бир бор эслатиб ўтилган.
