Бу ҳақда 2 февраль, якшанба куни АҚШ Давлат департаменти маълум қилди.
Рубио Панамага “муҳим минтақавий ва глобал муаммоларни” муҳокама қилиш учун келгани қайд этилди.
“Суҳбат чоғида Рубио АҚШ Президенти Дональд Трамп Хитой Коммунистик партиясининг Панама канали ҳудудига таъсири ва назоратининг ҳозирги ҳолати каналнинг ўзига ҳам хавф туғдириши ва Доимий бетарафлик ва объектдан фойдаланиш тўғрисида шартномани бузиши ҳақидаги дастлабки хулосани маъқуллаганини маълум қилди”, дейилади хабарда.
АҚШ Давлат котиби “бу статус-кво қабул қилиб бўлмайдиган” эканлигини маълум қилди.
“Агар зудлик билан ўзгаришлар бўлмаса, АҚШ шартнома бўйича ўз ҳуқуқларини ҳимоя қилиш учун зарур чораларни кўради”, деди Рубио Панама Президенти ва мамлакат ташқи ишлар вазири билан учрашуви чоғида.
Дональд Трамп ўзининг инаугурация маросимидаги нутқида АҚШ кемаларига каналдан фойдаланишда, хусусан, ҳатто АҚШ ҳарбий-денгиз кучлари кемаларига нисбатан қўлланилаётган оширилган тарифлар туфайли “адолатсиз муносабатда бўлишаётганини” таъкидлаган эди. Унинг айтишича, Хитой канални назорат қилмоқда, шунинг учун Америка уни қайтариб олиши керак.
Эслатиб ўтамиз, Панама Президенти Хосе Рауль Мулино аввалроқ АҚШ билан Панама канали устидан назоратни топшириш бўйича музокаралар ғоясини қатъиян рад этган эди.
Аввалроқ Трамп Америка кемалари учун транзит божлари камайтирилмаса, Панама канали Вашингтон назоратига қайтарилишини талаб қилиш билан таҳдид қилганди, деб хабар беради korrespondent.net.
