Бу ҳақда Фавқулодда вазиятлар вазирлиги маълум қилди.

Қайд этилишича, пойтахтдаги қатор бозор ва савдо объектларида давлат ёнғин назорати томонидан текширувлар ўтказилган.

Жумладан, Мирзо Улуғбек туманидаги «Наврўз» деҳқон бозори, Бектемир туманидаги «Midstroy servis» МЧЖ ва «Қўйлиқ» қурилиш бозори, Чилонзордаги Ташкент траде cэнтер МЧЖ ҳамда «Абу Сахий» бозори, шунингдек, Учтепа туманидаги «Фарҳод» деҳқон бозори айрим ҳудудларида ёнғин хавфсизлиги талаблари бузилгани аниқланган.

Шу сабабли мазкур объектларнинг камчиликлар аниқланган қисмлари электр энергиясидан вақтинча узилган. Бундан ташқари, «Ўрикзор» савдо комплексининг тўққизта блоки ҳам электр таъминотидан ажратилган.

Яккасарой туманида жойлашган «Аския» деҳқон бозори эса умумий ҳолати хавфсизлик талабларига жавоб бермагани учун тўлиқ электр таъминотидан узилиб, фаолияти вақтинча тўхтатилган.

Маълум қилинишича, аниқланган камчиликлар бартараф этилгач, барча объектларда электр таъминоти тикланиб, фаолият қайта йўлга қўйилади.

Вазирлик таъкидлашича, мазкур чоралар тадбиркорликка тўсқинлик қилиш учун эмас, балки фавқулодда ҳолатларнинг олдини олиш ва аҳоли гавжум жойларда хавфсизликни таъминлаш мақсадида амалга оширилмоқда.