Мен бу меҳнатда пишган, тажрибали аёлни 12 йилдан бери биламан. Мактабга илк бор ишга келганимдаёқ, унинг анча қаттиққўл, аммо адолатли раҳбар эканини сезганман. Аёл киши раҳбар бўлдими, албатта ўша корхона, аниқроғи мактаб унинг учун биринчи даражали, оила ва бошқа нарсалар кейинги ўринда турса керак деб тасаввур қилганман. Ўзига хос дид билан кийинган, нозиктаъб бу аёл оила ишларига анча бепарво бўлса керак, деб ўйлагандим.
Ўша куни, бундан 3-4 йиллар олдин, уйларига иш юзасидан кечаси боришга тўғри келди. Қарангки, баъзилар маза қилиб уйқуга кетган бу пайтда Манзура опа нон ёпаётган экан. «Ҳа,энди аёл киши кундузи ишласа, кечаси нонини ёпадида» деб ўйлагандим. Аммо нонларни тандирдан узиб дўконга топширишларини эшитиб ҳайратландим. Бу ҳар кунги ҳолат экан, мана кичкинагина тадбиркорликнинг оддий бир кўриниши.
Саҳармардондан туриб, бир нечта сигирни соғиб, уларни саранжомлаш оддий уй бекаларига ҳам оғирлик қилишини яхши биламан, аммо бу аёл ҳаммасига улгуриб ўз вақтида мактаб остонасида шу жамоа раҳбари сифатида иш бошлашига фақатгина қойил қолиш керак.
Оилада бирин-кетин 4 нафар яқинидан ажралиш ҳар қандай инсонни довдиратиб қўяди. Манзура опа ҳам бир қанча вақт ўзини ўнглолмай қолди, ҳаммаси тушда кечаётгандек бўлди. Аммо инсон иродаси ҳар нарсадан кучли экан. Фарзандини оёққа турғизиш, ҳаётга йўллаш ёлғизгина ўз зиммасига тушганини ҳис қилгач, тезда ўзини қўлга олди, ҳаёт қийинчиликларига қасдма-қасд яшай бошлади.
Оилада уй бекаси, мактабда раҳбар, жамиятда тадбиркор бу аёл кези келганда бир эркакка ҳам оғирлик қилиб қоладиган фермерликни ҳам ташламади. Нозик елкалар унуда кўтара олди.
Ҳа, биз мавҳум деб тасаввур қилган ирода, матонат, шижоат каби тушунчаларни шундоқ ёнимиздаги инсонларда кўриш мумкинлигига яна бир бор ишондим.
Манзура Ибрагимова ана шундай шижоатли, матонатли аёллардан. Шу боис оилада ҳам ота, ҳам она, набираларининг севимли бувижони, мактабда эса раҳбар, устоз сифатида эл-юртнинг чуқур ҳурматига сазовор бўлиб келяпти. 17-мактаб жамоаси, ўқувчилари эришаётган ютуқларда бу жонкуяр раҳбарнинг салмоқли ўрни бор.
Гулноза Собирова, Маънавият ва маърифат маркази Хоразм вилояти Тупроққалъа туман бўлими мутахассиси.
