Ижтимоий тармоқларда фуқаро онаси учун аёл шифокорларни юборишни сўраб фелдшерга таҳдид қилгани юзасидан тарқалган видеотасвир турли муҳокамаларга сабаб бўлмоқда. Мазкур ҳолат юзасидан Тошкент шаҳар ИИББ ахборот хизмати расмий муносабатни эълон қилди.
Унда айтилишича, Жорий йилнинг 1 апрель куни 1990 йилда туғилган Н.Х. онасининг саломатлиги ёмонлашгани сабабли тез тиббий ёрдам хизматига қўнғироқ қилиб, хабарни қабул қилган диспетчер 1998 йилда туғилган Г.З. дан фақат аёл тиббиёт ходимларини юборишини сўраган.
Диспетчер тез тиббий ёрдам кўрсатиш бўйича ички қоидаларда бундай талаб белгиланмаганини маълум қилиб, шу вақтда бўш аёл шифокорлар бригадаси бўлмагани сабабли, биринчи тиббий ёрдам кўрсатиш учун энг яқин бригадани юборган.
Фуқаро манзилга етиб борган бригадада эркак шифокорларни кўриб, уларни уйга киритмай норозилик билдирган ҳамда телефон орқали диспетчерни ҳақорат қилган.
Ҳолат юзасидан Юнусобод тумани ИИО ФМБ ходимлари томонидан фуқаро Н.Х. га нисбатан Ўзбекистон Республикаси Маъмурий жавобгарлик тўғрисидаги кодекснинг 41-моддаси (“Ҳақорат қилиш”) билан маъмурий баённома расмийлаштирилиб, тўпланган ҳужжатлар якуний қарор қабул қилиш учун судга юборилган.
