Маълум бўлишича, Янгиер шаҳар, «Шодлик» МФЙ ҳудудида жойлашган «GRILL BAR» кафесида уч нафар фуқаро ушбу кафе официантидан қўшни тумандаги можаронинг ўчини олмоқчи бўлган.
Улар 23 ёшли кафе официантини танасининг турли жойларига шафқатсизларча қўллари билан дўппослаб, оёқлари билан тепиб, ёғоч жисмдан фойдаланиб, тан жароҳати етказган.
Шунингдек, безорилик ҳаракатларининг олдини олиш чорасини кўрган бошқа фуқароларга қаршилик кўрсатган ҳолда, ҳодиса жойидан яширинганлар.
Натижада, жабрланувчининг ўнг қўл кичик бармоғи ёпиқ синиши, юқори чап томон иккита тишларининг синиб тушиши, танасининг кўплаб шилинган жароҳатлари билан Сирдарё вилояти Шошилинч тез тиббий ёрдам марказига мурожаат қилган.
Ҳолат юзасидан Янгиер шаҳар ИИБ ҳузуридаги Тергов гуруҳи томонидан Ўзбекистон Республикаси Жиноят кодексининг 277-моддаси 3-қисми «г» банди билан (безорилик ҳаракатларининг олдини олиш чорасини кўрган бошқа фуқароларга қаршилик кўрсатиб содир этилган бўлса) жиноят иши қўзғатилган.
Ушбу 19, 25 ва 26 ёшли фуқаролар гумон қилинувчи тариқасида жалб этилиб, процессуал тартибда ушланганлар.
Ҳозирда жиноят иши юзасидан тергов ҳаракатлари давом эттириляпти, деб хабар беради Ўзбекистон Республикаси ИИВ ҳузуридаги Тергов департаменти.
