Баҳснинг 7-дақиқасида бразилиялик полициячилар майдонга тушиб, меҳмон жамоа футболчиларини депорт қилишга уринганди. Натижада Аргентина миллий жамоаси футболчилари ва мураббийлар майдонни тарк этган эди.
Можаронинг келиб чиқишига Аргентина жамоасининг майдонга тушган уч футболчиси – дарвозабон Эмилиано Мартинес, ҳимоячи Кристиан Ромеро ва ярим ҳимоячи Жованни Ло Чельсо, шунингдек, захирада қолган ҳавбек Эмилиано Буэндиа Бразилияга кириш тартибини бузгани сабаб бўлганди. Бразилия соғлиқни сақлаш вазирлиги томонидан ўрнатилган тартибга кўра, ўшанда Англияда бўлган барча шахслар Бразилияга келганидан кейин, пандемия туфайли, 14 кун карантинда ўтириши талаб этиларди. Юқорида номлари келтирилган футболчилар эса бу қоидага амал қилмай майдонга тушган эди.
ФИФА ушбу можароли ҳолатни ўрганиб чиқиб, учрашув қайта ўтказилади деган қарорга келди. Баҳс қаерда ва қачон бўлишини ФИФА белгилайди.
Шунингдек, Аргентина миллий жамоаси ўйинчилари Эмилиано Буэндиа, Эмилиано Мартинес, Жованни Ло Чельсо ва Кристиан Ромеро икки ўйинга дисквалификация қилинди.
Шу ўринда таъкидлаш лозимки, икки жамоа ҳам аллақачон ЖЧ-2022 йўлланмасини қўлга киритиб бўлган.
