Лондон Университет коллежи олимлари деменция (бу ақлий фаолиятнинг барча жабҳаларига таъсир қилувчи, билим функциясининг сурункали, умумий, одатда қайтариб бўлмайдиган пасайиши)нинг асосий сабаблари ва ушбу касалликнинг олдини олиш усулларини аниқлашди, деб хабар беради РИА Новости Lancet журналида чоп этилган мақолага таяниб.
2017 йилда мутахассислар деменция ривожланишига туртки берадиган тўққиз асосий омилни аниқлади, улар орасида юқори қон босими, эшитиш қобилиятининг бузилиши, тушкунлик, диабет, семизлик, жисмоний фаоллик, чекиш, шунингдек, маълумот даражаси пастлиги ва мулоқотнинг йўқлиги.
Янги тадқиқот ушбу рўйхатга яна учта сабабни қўшиб қўйди. Спиртли ичимликларни суистеъмол қилиш, мия травматик шикастланиши ва ифлосланган ҳаво деменция ривожланишига ёрдам бериши аниқланди.
Шунингдек, мутахассислар, риоя қилинса касаллик хавфини 40 фоизга камайтириши мумкин бўлган тавсияларни беришди. Шундай қилиб, олимлар қон босимини 130 мм симоб устуни даражасида ушлаб туриш, бош жароҳатларидан қочишни ва агар керак бўлса эшитиш воситаларини ишлатишдан қўрқмасликни маслаҳат беришади. Шунингдек, улар семиришга қарши курашиш, спиртли ичимликларни истеъмол қилишни камайтириш, чекишнинг ҳар қандай туридан воз кечиш, тез-тез юриш ва яшаш учун экологик тоза жойларни танлашни тавсия қилади.
Тадқиқотчилар коронавирус пандемияси деменция билан касалланган одамлар учун қўшимча қийинчиликларни келтириб чиқаришини таъкидлади. Ўз-ўзини изоляция қилиш шароитида мулоқот етишмаслиги уларнинг ҳолатини ёмонлашишига туртки беради. Бундан ташқари, кўплаб беморлар ушбу қоиданинг аҳамиятини тушуна олмасликлари сабабли ижтимоий масофани ушламасликлари мумкин.
