Миллионлаб юртдошларимиз ҳис-ҳаяжон, катта умидлар билан телевизор, интернет тармоқлари орқали оғир атлетикачимиз Акбар Жўраевнинг чиқишларини кузатиб борди. Спортчимиз халқимиз ишончини оқлади! У Олимпия ўйинларида делегациямизга учинчи медални олиб берди. Медаль бўлганда ҳам ОЛТИН МЕДАЛЬ! Тағин Олимпиада рекорди билан!
Даст кўтаришда 193 килограмм натижа қайд этиб, рақобатчиси арманистонлик Симон Мартиросяндан 2 килограмм ортда қолаётган Акбаржон силтаб кўтариш баҳсида рақибини катта фарқ билан енгди. Умумий натижа 430 килограмм!
Акбар Жўраев 1999 йил 8 октябрда Тошкент вилоятининг Бўстонлиқ тумани Сойлиқ қишлоғида туғилган. Қайд этиш жоиз, бу қишлоқ терма жамоамиз учун бир қатор маҳоратли атлетларни етказиб берган. Жумладан, Акбарнинг ўзи оғир атлетика бўйича ўсмирлар ўртасида Осиё чемпиони бўлган акаси Азиз Жўраевга қизиқиб, ушбу спортга кириб келган. Биринчи мураббийи Фарҳод Мирзажановдан дастлабки сабоқларни олган. Токио Олимпиадасига Баҳром Мендибоев қўл остида тайёрланди.
Спортчимиз халқаро майдондаги илк муваффақиятига 2018 йил эришди. Акбар Жўраев ёшлар ўртасида ўтказилган Осиё чемпионатида олтин медалга сазовор бўлди.
Шу йилнинг ўзида Тошкентда ўтган U20 жаҳон чемпионатида кумуш медални қўлга киритган бўлса, йил якунида катталар ўртасидаги дунё биринчилигида тўртинчи поғонадан ўрин олди.
2019 йил Тошкентдаги ёшлар ўртасидаги жаҳон чемпионатида олган кумуш медалини Фижида олтинга айлантирди. Паттайя (Таиланд) мезбонлик қилган катталар ўртасидаги дунё биринчилигида силтаб кўтариш машқида иккинчи, икки кураш бўйича эса, тўртинчи натижани қайд этди.
Жорий йил апрель ойида пойтахтимиз мезбонлик қилган Осиё чемпионатида тажрибали Руслан Нурудинов билан рақобат олиб борган Жўраев Олимпиада чемпионига 1 килограмм фарқ билан имкониятни бой бериб, кумуш медаль эгаси бўлди.
Энди эса, 2019 йил Тошкентда олган ёшлар ўртасидаги Акбаржон спорт оламидаги энг юқори чўққини забт этди, дунёда тенгсизлигини исботлади. Ўзбекистон ҳисобига учинчи медални қўшиб қўйди.
— Ғалабадан чексиз ҳаяжондаман, — дейди Акбар Жўраев. — Шоҳсупанинг энг юқорисида туриб, байроғимиз юқорига кўтарилган, ғалабамиз шарафига давлатимиз мадҳияси янграган пайтда кўнглимдан кечган туйғуларни, ҳаяжонни сўз билан таърифлаб беролмайман. Бу ғалабани Мустақиллигимизнинг 30 йиллигига бағишлайман. Бундай ютуқлар Президентимизнинг спортга қаратаётган эътибори маҳсулидир. Париж шаҳрида ўтказиладиган кейинги олимпиадада ҳам ғалаба қозонишни, юртимизга яна бир олтин медаль олиб беришни ўз олдимга мақсад қилдим.
Ватанимиз байроғини юқорига кўтарган ҳамюртларимизнинг бундай ғалабалари мамлакатимизда спортга қаратилаётган юксак эътибор ўз самарасини бераётганининг ёрқин исботидир. Бугун бундай йирик ғалабалар миллионлаб юртдошларимизга чексиз қувонч, ғурур ва ифтихор бағишламоқда. Ўзбекистон номини дунёга ёймоқда.
Шаҳзод ҒАФФОРОВ,
“Янги Ўзбекистон” мухбири
