Sky News телеканалининг хабар беришича Жонсон шунингдек, инфекцияга чалинган ва касаллар билан алоқада бўлганлар учун мажбурий изоляция бекор қилиниши режалаштирилаётганини айтди.
Ҳукумат вакцинага асосланган ёндашувни амалга оширишни режалаштирмоқда, деди у. Бош вазирнинг таъкидлашича, эпидемиологик барқарорлик аҳолининг вакцина туфайли таъминланган иммунитетига боғлиқ бўлади.
Сиёсатчининг қайд этишича, вирус тарқалишининг олдини олиш учун ўрнатилган барча чекловларнинг бекор қилиниши Буюк Британия аҳолисига эркинликни чекламасдан ўзини ҳимоя қилиш имконини беради. Жонсон бу режанинг тафсилотларини парламентда баён қилиши кутилмоқда.
“Эҳтиёткорликдан воз кечишимиз керак, демаяпман, лекин энди ўзимизга бўлган ишончни қайтариш вақти келди. Биз шундай даражага етдикки, мувозанатни ҳукумат ваколатларидан, чекловлардан холи қилиш босқичига келдик. Муайян ҳаракатлар, шахсий жавобгарликни рағбатлантириш орқали иш кўришимиз лозим”, деди у.
Aйни пайтда, ҳукуматнинг баъзи илмий маслаҳатчилари бу инфекция кўпайишига олиб келиши ва CОVID-19нинг янада юқумли штаммларига қарши мудофаани заифлаштириши мумкин бўлган хавфли ҳаракат эканини айтишмоқда.
