Унда соҳага оид кўплаб имконият ва имтиёзлар хусусида сўз борди. Жумладан, биргина жорий йилда 170 та йирик чорвачилик лойиҳалари ва хонадонларда кооперация орқали 249 та лойиҳани амалга ошириш белгилангани айтиб ўтилди.
Бунинг учун, февраль ойида қабул қилинган қарор билан чорвачилик хўжаликларига гўштнинг ҳар бир килограмми учун тўланадиган субсидия 2 минг сўмдан 4 минг сўмга, сутнинг ҳар бир литри учун 200 сўмдан 400 сўмга оширилди.
Олиб келинадиган қишлоқ хўжалиги техникаси барча тўловлардан озод этилди. Соҳага 170 миллион доллар имтиёзли кредит линиялари очилди, 200 минг гектардан зиёд пахта ва ғалла майдонларига озуқабоп экинларни алмашлаб экиш белгилаб олинди.
Хусусан, ўзим раҳбарлик қилаётган туман мисолида гапирадиган бўлсам, Президентнинг тегишли қарорлари Оҳангаронда чорвачиликни ривожлантириш йўлидаги ишларга мустаҳкам замин бўлмоқда.
Масалан, шу вақтга қадар туман фермерлари фаолиятини қўллаб-қувватлаш мақсадида 6,2 млрд. сўм миқдорида субсидиялар ажратилди.
Ҳудудимизда чорва молларини саноат усулида боқишга алоҳида эътибор қаратиляпти.
Қорамолчилик йўналишида 43 та замонавий чорва комплексларини қуришни ўзимизга режа қилиб олганмиз. Ҳозирги кунда 32 та замонавий чорва комплекси ишга туширилди, қолган 11 тасида қурилиш ишлари олиб борилмоқда.
Қўйчилик йўналишида эса белгилаб берилган дастур бўйича 52 та замонавий чорва комплексларини ишга туширишишимиз керак эди. Ҳозирги кунда 39 таси ишга туширилиб, қолганларида қурилиш ишлари амалга оширилмоқда.
Ушбу чорва комплексларига 2021 йилнинг январь ойидан 2022 йилнинг май ойигача четдан наслли 53 минг 25 бош йирик шохли қорамол, 31 минг 11 бош қўй ва эчки олиб келинди.
Наслни яхшилаш борасида ҳам салмоқли ишлар амалга оширилмоқда. Мавжуд чорва молларининг зотини яхшилаш мақсадида йил бошидан 5,5 минг бош сигир сунъий уруғлантирилди.
Чорва молларининг зотини тез ва арзон усулда яхшилаш учун сигирларга эмбрион кўчириб ўтказишни йўлга қўйишни режа қилганмиз.
Шу кунларда ушбу масалада Ветеринария қўмитаси, Чорвачилик илмий-тадқиқот институти ва Аргентина давлатининг “Werthein Agro” компанияси билан ҳамкорликда иш олиб борилмоқда.
Шунингдек, Аргентина делегацияси билан бўлиб ўтган келишувга асосан туманда чорвачилик комплексини жорий этиш ва ривожлантириш учун 200 млн. долларга яқин инвестиция жалб этилиши кутилмоқда. Бунинг натижасида маҳсулдорлиги камайиб қолган ҳамда ўзимизнинг маҳаллий сигирларга эмбрион ўтказиш ҳисобига 100 фоизли наслли бузоқ олиш йўлга қўйилади.
Ерларимизнинг асосий қисми қир-адирлардан иборатлиги ва иқлим нисбатан юмшоқлиги сабабли, жун йўналишидаги меринос зотли қўйлар, ангор эчкиларни кўпайтиришга қулай. Авваллари Оҳангарон туманида 70 минг бошгача жун йўналишидаги меринос қўйлар ангор эчкилар боқилган.
Маълумот учун: 2016 йилда 105 бош меринос қўйлар бўлган. Ушбу чорва ҳайвонининг зотини яхшилаш учун Россиядан 50 бош зотли меринос қўчқорлар, 670 бош зотли меринос совлиқ қўйлар олиб келинди. Ҳозирги кунда уларнинг сони 4 минг 100 бошга, ангор эчкилар сони 7 минг 800 бошга етди.
Туманда сув танқислиги билан боғлиқ муаммони ҳал этиш учун инновация вазирлиги билан ҳамкорликда Туркия давлатидан қудуқ қазийдиган машина олиб келинди. Ушбу техниканинг афзаллиги 5 кунда 1200 метргача қудуқ қазиш имконияти мавжуд.
Бугунги кунда 3 минг 283 гектар ер майдонда сув тежовчи технологиялар жорий қилинган. Бу ишлар тизимли давом эттирилмоқда. Мисол учун, Австрия давлатининг “BAUER” компанияси томонидан “Абдураҳим ота” МЧЖ – 312 гектар, “Шерзод Бекзод фахри” фермер хўжалигида 200 гектар ер майдонида ёмғирлатиб суғориш технологияси йўлга қўйилди. Бунда ҳар бир гектар ер майдондан олинадиган ҳосил 3 баробаргача ошмоқда.
Шунингдек, Инновация вазирлиги билан ҳамкорликда янги технология асосида силос тайёрлаш, гидропоника усулида озуқа тайёрлаш ва ўзимизнинг лавлаги, беда уруғчилиги бўйича иш олиб борилмоқда.
Шуни ҳам таъкидлаш жоизки, Президентимиз бўлиб ўтган йиғилишда соҳа мутасаддилари ва ҳудудлар раҳбарларига бажарилиши лозим бўлган аниқ вазифаларнинг ечимини кўрсатиб берди.
Шундан келиб чиқиб, аҳолини озиқ-овқат, жумладан, чорвачилик маҳсулотлари билан узлуксиз таъминлаш борасида зиммамизга юкланган вазифаларни самарали адо этишда бор куч-ғайратимизни аямаймиз.
Абдурасул АБДУЛЛАЕВ,
Оҳангарон тумани ҳокими
