Коррупцияга қарши курашиш агентлиги томонидан бюджет буюртмачиларининг махсус ахборот порталлари орқали амалга ошираётган давлат харидларига оид эълонлари мониторинг тартибида ўрганилмоқда.
Ўрганишларда айрим давлат буюртмачилари томонидан давлат харидларини амалга оширишда қонунбузилиш ҳолатларига йўл қўйилаётганлиги аниқланмоқда.
Хусусан, жорий йил сентябр ойида Агентлик томонидан буюртмачиларга аниқланган жами 10,4 млрд. сўмлик қонунбузилишларни бартараф қилиш ҳамда келгусида шу каби ҳолатларга йўл қўймаслик ҳақида 26 та тақдимномалар киритилган.
Ҳозирда жами киритилган 26 та тақдимномалардан 23 таси бўйича харид натижалари бекор қилиниб, тегишли чора-тадбирлар белгилаб олинган.
Жумладан, Фарғона иссиқлик электр маркази акциядорлик жамияти буюртмачилигида махсус ахборот порталига жойлаштирилган 801 млн. сўмлик “Ёшлар форумини ўтказиш” юзасидан эълон бўйича давлат харидига оид ҳужжат ва маълумотлар ўрганилганида, мазкур давлат харидида ўзаро аффилланган шахсларга тегишли тадбиркорлик субектлари иштирок этиб, ғолибликни қўлга киритганлиги маълум бўлди.
Шу каби, Ангрен шаҳар ободонлаштириш бошқармаси буюртмачилигида махсус ахборот порталига жойлаштирилган 1,0 млрд. сўмлик “Тунги ёритиш чироқларини ўрнатиш хизмати” юзасидан эълон бўйича давлат харидида ҳам ўзаро аффилланган шахсларга тегишли тадбиркорлик субектлари иштирок этиб, ғолибликни қўлга киритган.
Бироқ, ҳар икки ҳолатда ҳам харид комиссияси томонидан ўзаро аффилланган шахслар харид қилиш тартиб-таомилларида иштирок этишдан четлатилмасдан Ўзбекистон Республикаси “Давлат харидлари тўғрисида”ги Қонуннинг 42-моддаси ва “Рақобат тўғрисида”ги Қонунининг 14-моддаси талаблари бузилганлиги аниқланиб, буюртмачи ва юқори ташкилотга харид натижасини бекор қилиш ва келгусида шу каби қонунбузилиш ҳолатларига йўл қўймаслик юзасидан тегишли чора-тадбирларни белгилаш ҳақида тақдимномалар киритилди.
Тошкент вилояти ҳокимлиги ҳамда Иссиқлик электр стансиялари АЖларининг жавоб хатларига кўра, буюртмачилар томонидан харид натижалари бекор қилиниб, келгусида шу каби қонунбузилиш ҳолатларига йўл қўймаслик бўйича тегишли чора-тадбирлар белгилаб олинди.
Шунингдек, ушбу ҳолатлар юзасидан тўпланган ҳужжатлар ҳуқуқий баҳо бериш учун Бош прокуратурага юборилди.
