— Болалигимдан энг катта орзуларимдан бири хориждаги нуфузли университетда таҳсил олиш эди. Оддий оилада ўсган мен каби ёшларга бу ушалмас орзудек туюлиши мумкин. Мана, кўриб турибсиз, “Эл-юрт умиди” жамғармаси орқали бу орзумга эришдим.
Айни пайтда дунёда энг кучли 100 таликка кирган Аризона университетида давлат бошқаруви ва сиёсат йўналишида таҳсил оляпман. Шунингдек, ўқиш мобайнида жуда кўп амалиётлар ўтаяпман. Мисол учун, ёзги таътилда БМТ ҳузуридаги ёзги ўқув мактабида ўқидим ҳамда амалиёт ўтадим. Қолаверса, БМТ ташкил этган иккита нуфузли халқаро конференцияда иштирок этдим. 2023 йил 6-12 октябрь кунлари Туркияда бўлиб ўтадиган “Best Diplomats” конференциясида иштирок этишга тайёргарлик кўряпман.
Нафақат мен, балки “Эл-юрт умиди“ жамғармасининг барча стипендиатлари учун яратилган имкониятлар туфайли биз жаҳон миёсида ўтказилаётган конференцияларда қатнашяпмиз.
Давлатимиз раҳбари билан учрашувда орзуларим ҳақида гапириб бердим. Келажакда хорижда олаётган билим ва кўникмаларни ватанимиз равнақи йўлида ишлатиш, хотин-қизларнинг давлат ва жамиятда ўз ўрнини топишига кўмаклашиш ниятидаман.
Жамғарма стипендиатлари Ўзбекистонга қайтганидан сўнг нафақат давлат ташкилотлари, балки нодавлат ва хусусий тизимда ҳам фаолият юритишса, яхши бўларди, деб ўйлаймиз.
Ҳозир мен Ўзбекистоннинг барқарор ривожланиш мақсадларидан бири бўлган гендер тенглик бўйича 2030 йилга қадар қўйилган вазифалар ҳақида тўхталмоқчиман. Бунда хотин-қизларни камситишнинг барча турига барҳам бериш, эрта ва мажбурий никоҳ каби зарарли иллатларни йўқ қилиш, шунингдек, репродуктив саломатлик ва бу борадаги ютуқлардан универсал фойдаланишни таъминлаш ва, албатта, аёлларга тенг ҳуқуқ бериш кабилар қамраб олиниши жуда муҳимдир.
2030 йилга бориб, олдимизга қўйилган барча вазифаларга тўлақонли эришишимиз йўлида юртимиз аёлларининг давлат ва жамиятда ўз ўрнини топишига ишонамиз.
Президент билан учрашиш бизга ўзгача руҳ бағишлади. Юртимизда ёшлар учун яратилган имкониятлар ва билдирилаётган ишонч ҳар биримизга катта куч ва жўшқин илҳом бермоқда. Халқни рози қилишга қаратилган ислоҳотлар учун бор билим ва кучимни, хорижда ўзлаштирган тажрибамни йўналтираман.
