Ҳозиргидек тинч, озод кунларни кўриш у вақтлар катта армон эди, мудом қўрқув, хавотир домида яшаганмиз. Яратганга минг шукр, шу кунларга етдик. Куни кеча Шавкат Миромоновичнинг табрик хатини, пул мукофотларини, совғаларини олган эдим. Бугун набирам келиб яна бир хушхабар айтди.
Муҳтарам Президентимиз уруш қатнашчиларининг пенсиясини оширибди. Барака топсин. Юртимизда кўп яхши ишлар бўляпти. Ўзим кўчага кам чиқсамда, кўзимдан нур қочиб, қулоғим сал панд берсада, болаларнинг гап-сўзидан, ҳаракатидан, юз-кўзидан сезаман буни. Фарзандларим келажагидан кўнглим тўқ. Ҳаммаси яхши.
Ўзи одам қариганда бир оғиз ширин сўз, озгина эътибор, меҳрга ўч бўлиб қоларкан. Тўғри камимиз йўқ, фарзандларимиз ардоғида яшаяпмиз. Лекин одамга давлат раҳбарининг эътибори барибир бошқача таъсир қилади. Ҳали ватанга керакдек ҳис қиласан ўзингни.
Президент бугун одамлар билан учрашиб, уйларга кириб меҳмон бўляпти. Халқни эшитяпти. Бунда ҳикмат кўп. Биттасини айтсам: Ўзбекистон бугун яна меҳр мамлакатига айланди. Қариялари, фарзандлари, аёллари эъзозланган юртда доим тинчлик-хотиржамлик бўлади, халқ мурод-мақсадига етиб яшайди.
Бугун бизнинг қўлимиздан келгани дуо: дунёмиз тинч, ризқимиз бутун бўлсин, давлат раҳбари халқни ўйлаб чарчамасин, бизни ўйлаганлар муродига етсин, ишларига барака берсин.
Самандар ХУДОЙБЕРГАНОВ,
Иккинчи жаҳон уруши қатнашчиси.
Хоразм вилояти
