Андижон вилояти божхона бошқармаси ходимлари Ўзбекистонга кириб келган автотранспорт воситаларининг юк кузатув ҳужжатлари ва электрон декларацияларини ўрганиш жараёнида айрим ҳолатлардан шубҳаланган.
Шундан сўнг транспорт воситалари белгиланган тартибда “қизил” йўлакка йўналтирилиб, божхона кўригидан ўтказилган.
Кўрик натижасида ҳужжатларда кўрсатилмаган товарлар борлиги маълум бўлган. Хусусан, юклар орасидан 23 минг дона велосипед шинаси ҳамда электромотороллерлар учун 2200 дона қўрғошинли аккумулятор аниқланган.
Божхона органлари маълумотига кўра, мазкур товарлар электрон декларациялар ҳамда йўл-юк кузатув ҳужжатларида қайд этилмаган.
Аниқланган товарлар вақтинча сақловга олинган. Ҳолат юзасидан ҳозирда суриштирув ишлари олиб борилмоқда.
