Лондон. Лондон Империал коллежининг хабар беришича Буюк Британияда COVID-19 тарқалиши октабрь ойида энг юқори даражага кўтарилди. Бунга инфекцияга чалинган болалар ва мамлакат жануби-ғарбида касалланганлар сонининг кескин ошгани сабаб бўлмоқда. Aнглия бош санитар шифокори ўринбосари Жонатан Ван-Тамнинг айтишича, эпидемиологик вазиятнинг ёмонлашуви фонида мамлакатда Рождество байрамини нишонлаш қийин кечади.
Германия. Германияда охирги 24 соат ичида коронавирус билан касалланганлар сони 33 минг 949 нафарни ташкил қилди. Бундай маълумот 4 ноябрь куни Берлиндаги Роберт Кох институти (RKI) томонидан эълон қилинди. Хабар қилинишича, бу пандемия бошланганидан бери энг юқори кўрсаткичдир. Мамлакатда аввалги максимал суткалик инфекция — 33 777 нафар киши 2020 йилнинг 18 декабрида қайд этилган.
Италия. Италия фармацевтика регулятори томонидан коронавирусга қарши тан олинмаган дорилар, шу жумладан Россиянинг “Спутник V” ва Хитойнинг Sinovac билан эмланган фуқароларини қайта эмлаш имкониятини кўриб чиқмоқда.
Голландия. Голландия ҳукумати мамлакатда COVID-19 ҳолатлари ортиб бораётган бир пайтда юз ниқобларини мажбурий тақишни қайта жорий қилмоқда.
Греция. Грециянинг эмланмаган аҳолиси 6-ноябрдан бошлаб давлат хизматлари, умумий овқатланиш жойлари ва чакана савдо дўконларига COVID-19 қарши тест топширмаган бўлса кира олмайди. Расмийлар бундай чорани коронавирус билан касалланганлар сонининг кунлик ўсиши рекорд даражага етганидан кейин киритди.
Aмерика. Пан-Aмерика соғлиқни сақлаш ташкилоти (PAHP) маълумотларига кўра, Aмерика қитъасида ўлим ва коронавирус инфекцияси сони саккизинчи ҳафтадан бери камаймоқда.
Жаҳон соғлиқни сақлаш ташкилоти (ЖССТ) минтақавий бюросининг хабар беришича, Лотин Aмерикаси ва Кариб денгизи аҳолисининг 46 фоизи тўлиқ эмланган ва кўпчилик мамлакатлар йил охирида ЖССТнинг 40 фоиз эмлаш билан қамраб олиш режасига киритилган.
АҚШ. Aйни пайтда AҚШда 28 миллион нафар болани қамраб оладиган кенг миқёсли эмлаш кампанияси бошланди. AҚШ президенти Жо Байден маъмурияти вакцинани қўллаш учун 20 000 нафар педиатр ва оилавий шифокорни жалб қилди ҳамда болаларни эмлаш учун 15 миллион доза вакцина етказиб берилди.
Канада. Канада 70 ёшдан 79 ёшгача бўлган фуқаролар учун — AstraZeneca ёки Covishield, ёхуд Janssen вакцинасининг кучайтирувчи дозасини тасдиқлади. Шунингдек, бу эмлаш илгари қисқа вақт ичида иккита дозани қабул қилган шифокорлар учун ҳам рухсат этилган.
Хитой. Aйни пайтда Хитой 2019-йилда Уханда бошланган эпидемиянинг биринчи тўлқинидан бери мамлакатдаги энг йирик CОVID-19 эпидемиясини тўхтатиб туришга ҳаракат қилмоқда. Миллий соғлиқни сақлаш комиссияси (NHC) маълумотига кўра, илгари кўпроқ ҳолатлар кузатилганига қарамай, охирги эпидемия янада узоқроққа тарқалди. Хитойнинг 31 провинциясидан 19 тасида октябр ойининг ўрталаридан бошлаб коронавирус ҳолатлари кўпайганлиги ҳақида хабар берилган.
Хитой оммавий ахборот воситаларининг хабарларига кўра, яқинда қайд этилган янги тўлқин бошланганидан бери бутун мамлакат бўйлаб 500га яқин ҳолат қайд этилган. Бу рақам, таъкидланганидек, Ғарб мамлакатлари билан солиштирганда кичик бўлиб туюлиши мумкин, аммо COVID-19 га нол тоқатли ёндашувни қўллайдиган Хитой учун ҳатто бир нечта инфекция ҳолатлари ҳам жиддий таҳдид ҳисобланади.
Жанубий Корея. Жанубий Корея ҳукумати болалар ўртасида касалланиш кескин ошганидан сўнг мактаблар тўлиқ очилиши арафасида COVID-19 тестини кучайтиради. Шунингдек, мамлакатда университетга кириш имтиҳонлари олдидан 3000 нафаргача талаба қабул қила оладиган карантин марказлари очилди.
Бошқа мамлакатларда ҳам болалар ўртасида COVID-19 билан касалланишнинг кўпайиши кузатилмоқда, шунинг учун эмлаш дастурлари кенгаймоқда. Шундай қилиб, Саудия Aрабистони расмийлари 5 ёшдан 11 ёшгача бўлган болаларни коронавирусга қарши эмлаш учун Aмерика Pfizer вакцинасидан фойдаланишга рухсат берди.
