Исроил ва Америка элчиларини ўз ҳудудидан чиқариб юборган ҳар қандай араб ёки Европа давлатига Ҳормуз бўғозидан чекловсиз ўтиш имконияти берилади. Бу ҳақда Ислом инқилоби қўриқчилари корпуси (ИИҚК) 9 март, душанба куни эълон қилди, деб хабар берди CNN.
ИИҚК ушбу мамлакатлар Исроил ва Қўшма Штатлар билан дипломатик алоқаларни узса, стратегик сув йўлидан ўтиш учун “тўлиқ ҳуқуқ ва эркинликка” эга бўлишларини айтди.
“Дунё нефть таъминотининг қарийб бешдан бир қисми бу тор, 21 миля кенгликдаги сув йўли орқали ўтади, бу ҳозирда глобал бозорлар учун жуда муҳим ва юқори хавфли нуқтадир”, дейилади мақолада.
Нашрнинг қўшимча қилишича, АҚШ ва Исроилнинг Эрон билан уруши иккита асосий сабабга кўра нефть нархларининг кўтарилишига олиб келди: Ҳормуз бўғозининг деярли тўлиқ ёпилиши ва Яқин Шарқда нефт қазиб олишнинг секинлашиши.
Эрон аввалроқ Ҳормуз бўғозидан ўтишга уринаётган барча хорижий кемаларни “ёқиб юбориши” ҳақида огоҳлантирган эди.
Кейинчалик Теҳрон ҳозирда Ҳормуз бўғозини ёпиш чораларини кўрмаганлигини, аммо келажакда буни амалга ошириши мумкинлигини маълум қилди, деб хабар берди korrespondent.net.
